أصحابنا

أصحابنا يابو فهد ماهم اصحاب
تغيرو يابو فهد دون سبه
وتبدلت احوالهم والغلا غاب
وهبة رياح من الجفا في مهبه
هذا الزمن يابو فهد مابه احباب
الا قليل ٍ بالعطاء والمحبه
احباب صدقٍ دون لعبه وكذاب
ولادورو بالكذب في كل شبه
ناس لهم بالقلب واحات وهضاب
ياكل حنين القلب حبه بحبه
كلامهم واحساسهم بالحلا ذاب
ناس ٍ على الفزعات هذا مطبه
تغنيك ائي والله عن بعض الاقراب
وللحب معنى بالحنايا مصبه
في قربهم جنات وردٍ وعناب
طعم العسل مابين قشره ولبه
والا الزمن محكوم في بعض الاتعاب
واوضاعنا في هالزمن مستتبه
وانا انا مع صاحبي دون الاجناب
ادمح خطاه وبالخفا مااسبه
ان جيت له بود صادق وترحاب
ولجرحه الماضي حياته وطبه
ارضيه انا بالنفس من دون الاغراب
واتحمله من جّد مااقدر اكبه
يعني انا ماانساه من دون اسباب
وابادله في حب قلبٍ يحبه
لأنه نهايه هالعمر حفنة تراب
وقبرٍ يضمك وكل شي تنبه
خلك على وضح النقا دوم بحساب
وحاسب ضميرك بالحقيقة وربه
والصبر يفتح لك مع الوقت ابواب
وتعيش في دنياك من دون غبه
ائي والله اني للغلا دوم طلاب
ومن باعني فالله ربي وربه
اصحابنا ياللأسف ماهم اصحاب
تغيرو ياللأسف دون سبه
فهيدالبقعاوي