سلطان طاب وعاد والشعب ممنون

إفرح.. وبادل بالفرح ساير الكون
والبس من ثياب الفرح ما تمنا
اليوم يومك غير بالشكل واللون
ويحق لك لبس الفرح ياوطنا
سلطان طاب وعاد وابليس ملعون
(والحمد لله جاء على ما انتمنا)
متمتع (ن) بالعافيه سيّد العون
اللي لصعبات المواقف تبنا
ابو اليتاما يوم الايتام يبكون
عن مسح دمع عيونهم ما تونا
سلطان في ظله عن الظيم يلهون
وضحكة حجاجه طب حال المعنا
يجود كفه يوم غيره يشحون
يعطي وكفه بالعطى ما يمنا
كم غاث ملهوف (ن) مقيّد ومسجون
واعتق ارقاب (ن) حولها السيف دنا
وكم من مريض (ن) بالمرض كان مطعون
ومن فزعته بأمر الولي جاه منا
وكم ضايقاً جاله من الدين محزون
ومن بعد ضيق الحال زغرد وغنا
من خلقته شامخ وعالي عن الدون
شخصه رفيع وفي سموه إمكنا
سلطان خير وباسمه الخير مقرون
وعليه رايات المعزه اتبنا
قايد سرايا الجيش ما عاش بالهون
كم قاد سرب ونزح الضد عنا
يسهر وشعبه بالمنام يتهنون
ويكافح العدوان منا ومنا
لو كل شعار الجزيره يغنون
في مدح ابو خالد به المدح ثنا
الشعر ما يوفيه مهما يقولون
لو هاج بحره بالغلا واستجنا
سلطان طاب وعاد والشعب ممنون
كل (ن) حمد رب البريه وهنا
إفرح.. وبادل بالفرح ساير الكون
للعزم دايم والفرح ياوطنا
خلف الاسيد الشراري
محافظة القريات