لا ترجي إلا واحد ن ما يخليك

هو الذي لازم تخافه بممشاك
اوزن أخطاك لربك اللي ينجيك
اكسب رضاه إن كان تبغاه يرعاك
واليا كسبت رضاه برضاه يرضيك
ترضا عليك الناس وتدور رضاك
اصدق مع المولى ترى الله يقديك
لا تجعل الدنيا تنسيك مولاك
يا حلو لا ارضيته ومن ثم والديك
أد الحقوق لوالدك قبل دعواك
بده على نفسك ترى هو مبديك
يومك صغير يحط قلبه بيمناك
واحرص على اللي ما بعمره يعاديك
أخوك لك محزم وبالعمر يفداك
والعم والد وأنت تحفظ مباديك
والخال تاج وقبل تنصاه ينصاك
أطراف جدانك على القرب تاتيك
كل ن على جنسه هذولا وذولاك
وهناك تلقالك علوم ن توديك
لدروب باب الخير تسديد لخطاك
إكرامك لضيفك ودرعك بناخيك
والجار حقه في محله وإلى جاك
واحقوق خلق الله لو بليس ينسيك
مايفلح الظالم على دور الأفلاك
بعض الوصايا جبتها لي ووصيك
خله على بالك إذا الوقت خلاك
واتبع كتاب الله والهدي يهديك
سنة محمد بس واشبح بمرقاك..