كم واحدٍ من أبعد الناس يغليك

يارجل ياللي واضحٍ في مباديك
عطني شوي شوي لي من زهابك
كانك بناخيه تراني بناخيك
فالوصل ما بين الرجال متشابك
هذا ولد عمٍ قريبٍ يواليك
إن ضقت تلقى وقفته مع جنابك
يفرح ليا جابوا هل العرف طاريك
ويضيق وان صكت عليك المشابك
بالطيب يعني لك وبالطيب يعنيك
يدخل حسابه بالوفاء من حسابك
وهذا صديقٍ بالمشاعر يراعيك
لو تلتفت في بعض الاحيان اجابك
وهذا رفيقٍ بالمواقف يداريك
ما طاع فيك بغيبتك من حكابك
كم واحدٍ من أبعد الناس يغليك
يرجح نصابه بالوفاء في نصابك
على خطى ممشاه يتعب مساريك
ياصل ولا تاصل على حد بابك
على الدروب النايفه من معانيك
يفوق سهمه فوق عن سهم سابك
بالعرف والحكمه يصك الشبابيك
وليا بغيته باللوازم حضابك
عن زلتك يرفى خمالك ويرضيك
وان غبت والله ما اهتنا في غيابك