لا يا بعد من تمنى يسكن بجوفي

اشتاق لك باأحلك الاوقات وظروفي
وادري بك أنك تخفف من معاناتي
وأبعد عنِك كلها لجلك ومن خوفي
أخاف تفجع خفوقك صرخة آهاتي
حملت همي على الامتان وكتوفي
ماودي اخْبرك شنهو سر الاسكاتي
على الكريم الفرج لاحانت صروفي
ماهي بعاده لغيره رفع شكواتي
لا يابعد من تمنى يسكن بجوفي
وشلون تجهل غلاتك وانت في ذاتي!
ما شفتني صامدن بالود بوقوفي
ومحبتك من عروق القلب مسقاتي
لو غبت عنكّ ترى لك خافقي يوفي
مخلص معك دون تزييفن وشكّاتي
اما يجيبك ليا من غبت بطيوفي
وإلا بسرعه مع الأشواق لك ياتي
قابلتني بالعتب برماح وسيوفي
اطعن وفدوه وأنا بلمم أشتاتي
أصلاً بسلم المحبة في حسب شوفي
فدوتك من ينقتل وش عاد لو ماتي
وان كان تسمح فهي حسْنة ومعروفي
يسعد بها اللي عشق يا سِرّ نبضاتي
بقابلك في ورود الحب بكفوفي
يكفي قطفت المحبة منك باقاتي
واتوجك بالمحبة غالي حروفي
وأجيك اسوق الغلا في داخل ابياتي
ولك المحبة ولو جارت بي ظروفي
أشتاق لك حتى لو طالت معاناتي
عبدالعزيز صالح العوض