أصول التكانة

عاد انت لا تأخذ كلامي على جد
شفتك خثرت وقلت اصب الميانه
ولو ادري انك يوم امازحك تبي تصد
علمتك شلون الثقل والتكانة
ما اكبر من انفاس الخطا لاحلى الرد
اولا الثقيل ليا كتب عنفوانه
ما قلت لك يا صاحبي للصبر حد
وما قلت لك يا صاح... إلا الخيانة
وما قلت لك لا تبيح لخافقي سد
ولا ترخي لمهر الخطايا عنانه
ولا تقطع بسيف الغلا شعرة الود
ولا تعبث بوجه الزمان ومكانه
ولا تستفز الموج بالجزر والمد
لا صار تدري عن دهاليز شانه
هذي جروحك عدها لو تبي عد
وانت تعرف كيف الخفوق وحنانه
مرات اقول انك على الجرح منحد
ومرات اقول اكثر جروحك لعانه
ومرات اشوفك غير لا مع ولا ضد
مسكين لآخر مفردات السكانه
وما بين ذي وذيك والجذب والشد
جيتك وفي قلبي لقلبك امانه
وابيك تأخذها على محمل الجد
وان قلت اهانه.. فاعتبرها اهانه
يا صاح انت ........ من انك تجي ند
لنك كذا.. لا مستوى ولا مكانه
فخفف لضي شوفك اذا صاحبك لد
ولملم بقايا تيه ولى زمانه
وخلك على مفرق شقا الأمس والغد
ما بين خفاقك ورعشة هوانه
وليا بغيت تصد يا صاحبي صد
مادام علمتك اصول التكانة
عوده بن نزال المضياني - عرعر