قبل الإشراق

النجمة اللي بينت قبل الاشراق
منها شعاع الشمس ضيع محله
في صمت نظرتها سواليف عشاق
ذاب بشفاياها حلى الكون كله
بعيونها بسمة لقاء ودمعة افراق
وأهدابها سيف المنايا تسله
للعين من يد المخاليق ما لاق
إلا الحبيبه شمس عمري وضله
بنت الشرف من نسل زاكين الاعراق
من حسنها كل البني وقفٍ له
يالفارسه بالقلب لك لاح براق
مزن الهوى يا بنت قلبي يهله
يا فاتنه قلب الجريح الذي تاق
للمهرة اللي خاطري ما يمله
بنتٍ أحبه واطلب ارضاه واشتاق
للي رفيعه عن دروب المذله
من سافرت والكون في ناظري ضاق
والقلب من شوقه به الفين عله
الليل طال وجونا ما بعد راق
يا كود نسمات الشقى مسفهله
أنا على عهدٍ عطيتك وميثاق
والقلب كاتبك بسماء الحب خله
يفداك شوف العين والروح تنساق
ولجل الغلا قلت العمر جاك كله
ويفداك قلبٍ تلتهب فيه الأشواق
لا صار حبك كل يومٍ يتله