الموت حق

في رثاء الشيخ ماجد بن وليد بن شويه غفر الله له
مدري أعزي «سبيع» والا اعزيه
«فهد» ولد «ماجد» رفيع.. المكانا
الموت حق وكل مخلوق.. بيجيه
ما نقدر نرده إذا يوم جانا
لا وقفت ما يسبق الموت.. تنويه
ماهو يميز طيبنا من ردانا
ولا نفقد الا من تنومس مباديه
من ربعنا وإلا بعد من.. اعدانا
وحنا فقدنا من تشرف مساعيه
حنا فقدنا كوكب في سمانا
حنا فقدنا من تذري محاجيه
ركن من ركون القبيله ذرانا
«ماجد» بدربه سيرة «وليد» تغريه
مشى مماشي شايبه ماتوانا
شرف براس النايفه من عواليه
في مرقب ما جاه ولد.. الهدانا
المجد دربه.. والمعزه.. مماشيه
له وقفة فالوقت تقطع ضمانا
«ماجد» كتاب واضحات معانيه
نقراه يومه في حياته قرانا
وان كان غاب اليوم ما غاب طاريه
له سيرة تعرف عيانا .. بيانا
كبارنا وصغارنا اليوم تبكيه
يا الله عساه مخلدا.. فالجنانا
وانا بأعزي «سبيع» وايضا بأعزيه
«فهد» عسى الرحمن يجبر عزانا