شهر العبادة والتسامح والدعاء

من قصيدة في - شهر رمضان الكريم - للشاعر مرشد البذال - رحمه الله-.
من اختيار/ سعود ناصر القحطاني - الخرج
شهر العباده والتسامح والدعاء
ومحبّساتٍ به جميع الجان
باشر صيامك يابن آدم واخشع
خشعة جسد ما هي خشوع لسان
لا يستريسك جاهلٍ في جهله
ترى الجهول يوهّم الفهمان
لا يخلفك كبر النعم عن دينك
بعض النعم هي سبّة الطغيان
إلى كنت متعافي ومالك واجد
تنوي السفر عن صوم هالزمان
وتقول أسوق من الحساني عنِّي
والمقبله ما نترك رمضان
لا يقبل الله منك ما سوّيته
الا إن كانك رايحٍ مرضان
الله علم داير بأيا موقع
حدر الثرى والا على الوجدان
العن إبليس وخل مكسب قومه
ترى المكاسب مكسب الغفران
لا تحسبّن المال يدفع سيئه
عند الحوادث ترخص الميلان
ما أحدٍ إلى منه تقدّم يومه
يشرى حياته بأكثر الأثمان
انت اعتبر مطلعك من بطن امك
عريان وترجع للولي عريان
ان كان ما يسترك طيب أعمالك
والا كتبت المفلس الخسران
يالعبد لا تنسى فضايل ربك
لا تجزي الخلاق بالجحدان
صم واعتصم بالله واحسن صومك
يا بخت منهو بالشهر فرحان
كمّل تراويحه وحفظ صيامه
مدِّي الأمانه بشّره ربحان
الصوم حقّ الله على مخلوقه
ومن لا وفى في حق ربه خان
به فرحتينٍ خصصن للصايم
يسترّ فيهن يالله الأيقان
الأوله منهن إلى حل المسا
قام يترقب حروة الأذان
والثانيه يالله بكسب الثانيه
نهار يوضع قدمه الميزان