فخر العروبة,, والعدو ماولاها

للوطن

حقيقة تاريخية يعتز بها ابناء المملكة العربية السعودية وهي انها مهد الاسلام,, وارض الحرمين الارض التي لم تطأها قدم مستعمر.
عن هذه الحقايق,, ونواح اخرى نعتز بتوفرها في بلادنا الغالية.
تتحدث القصيدة التالية التي كتبها الشاعر المعروف عبدالله بن سعود الصقري منذ أكثر من عقد ونصف من الزمان حيث يقول:
تاج الجزيرة نجد والمجد مبداه
من خلقة الدنيا لما منتهاها
نجدٍ على اسمه نجد يا رفع مبناه
فوق الجزيرة راسها في سماها
نجدٍ على اسمه نجد ما اكثر مزاياه
فخر الجزيرة عالي مستواها
نجد الشهامة والشرف والمرّواه
نجد الشجاعة والكرم في عطاها
نجد الشريعة والعدل والمساواه
بالدين والدنيا على الله جزها
من ضامته دنياه للعز ينصاه
ام الجميع وتكرم اللي لفاها
كل العروبة تقتدي به ومسعاه
والله على كل المفاخر هداها
وغير العروبة كل الاسلام ترعاه
والله يرعى بالوطن من رعاها
يا جاهلٍ في نجد شرَّف قراياه
والمدن واللي ساكنن في فضاها
حتى تشوف اللي على الجود شفناه
الخير كله واضح في وطاها
كل الجزيرة مثلها ما هضمناه
منها وفيها كلها من سواها
يشهد لها التاريخ بأدناه واقصاه
فخر العروبة والعدو ما ولاها
الله حباه ابكل خير وسواه
والله عن العدوان بأمنه حماها
من دونه الابطال تاقف سراياه
لوى الطامع رجع ما قواها
ومن دونه آل سعود واشرف رعاياه
بالروح يفدون الجزيرة وماها
حنَّا هل التوحيد حنا حميناه
وحنا الذي في كل يوم ذراها
وحنا الذي بالروح والمال نفداه
لا جا نهار فيه يقدح سناها
وآخر كلامي تاج نجد ومبداه
من خلقة الدنيا لما منتهاها
صلاة ربي عد وبل نثر ماه
على النبي الهاشمي منتهاها