في روضةٍ خضرا بها أشجار وأزهار منظر غزالٍ طامر بالهوى فوق خلى صغيره بين الاشجار محتار والجو ما يسمح ولا هوب موثوق الماء يشادي لونه الغب الابحار واللي يشوفه يرتفع عنده الشوق علي الرشيد - رياض الخبراء الريم عنوان الحلا والرشاقه في قفزةٍ متفرّده من صفاته الريم من كل الحلا فيه باقه وحلو الحلا متكاملٍ مع خلاته قوّه وحسنٍ توّجتها لباقه ما حازها كود الغزال بصفاته وصاف الغدير اللي له العين شاقه وبرًّ زهرها نسمته مع نباته البرّ والصحرا جمال وعراقه بقلوبنا دايم يزود بغلاته سعود عائش الحربي - جدة غزال شارد ارتفع فالسما فوق له فزّةٍ شالت جسده .. وخفوقه شكله تذيّر والخطر واصله سوق في روضةٍ والماء على حدعوقه منظر طبيعه في مناطق لها ذوق العشب طافح راويٍ من عروقه واللي يدل الدرب ماهوب مسبوق يمّه توجه خل نكسب شروقه حمد عبدالله الوايلي - حوطة سدير هذا الغزال اللي تعلا وفي الجو حلّق وخلّى صايده ما يشوفي في فزّته أسرع من البرق .. والنّو الخوف حدّه واجبرته الظروفي واللي يبونه مكسبٍ ما تهنّو زادوا على الحسرات ضرب الكفوفي سليمان عبدالعزيز السنيدي - الرياض السيل حل وكلنا نهتني به جماعة الغزلان الكل مسرور تركض وتقفز يا صعب من يجيبه هذا الغزال بسرعته دوم مشهور يا رب تحميها ولحدٍ يصيبه بأرضٍ بدار الخير والمجد والنور عند العرب ما هي تراها غريبه مجبور انا في حبها اليوم مجبور محمد عبدالعزيز الخنيفر - أشيقر قفزة غزالٍ خايفٍ من عدوّه يبي السلامه كان هي بالمناوي معه خويّه حاول القفز توّه شكله تورّط صار بالقلب لاوي الموت حدّه يقطع الوحل قوّه محدٍ يلومه واثب اليوم قاوي والمفترس قدام ينظر علوّه يبي الغزال وكامنٍ بالملاوى خليف فهيد الحربي - الرياض سبحان منهو صوره زين الاوصاف الجسم ناحل والرشاقه رهيبه مد اليدين وباقي الجسم شفاف العود لين زايد الطول عيبه خالد بن ناصر المخيمر - روضة سدير يا غزال أفرح إلى شفت الخباري وأحمد المعبود بالنعمه رزقنا والأيام تزين في شوف الصحاري وأرضنا الخضرا ترى فيها سعدنا والرفق مطلوب في وسط البراري لا بدا المرباع نوّر في بلدنا والمواتر وأهلها لازم تداري لا تدوس الأرض لاجل اللي بعدنا ريان محمد الخنيفر نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى: [email protected] ويا هلا.. صورة العدد Your browser does not support the video tag.
