قصيدة “السندباد” للشاعر ” محمد الدحيمي”..

سفر .. غربة .. متاهات وطريقٍ مامشته خطاي
انا والسندباد اللي يحث خطاي تسرع به
•••
اذا شق المساء وجه الشفق قلت ابتدأ مسراي
نحرت الوادي اللي مانحره الذيب من رعبه
•••
تحزمت الشقا واخذت شلفا جدي بيمناي
تزهبت الكفن والخوف ولد اللاش يشبع به
•••
ادوّج خطوتي واسج لا ذاكر ولا نساي
احدّر بالسهل واليا زمالي مرقب اطلع به
•••
اثرني كلما اسج وعلى غربي طويت رشاي
طواني واديٍ كنه يبات الموت في شعبه
•••
وانا والله ولد نشمي ولكن خيبت هقواي
حظوظٍ كلما طيرت لي طيرٍ توقع به
•••
وصلت وفي يديني سلعةٍ ماسامها شرّاي
لدارٍ قالوا اهله : يانما ماجبته ارجع به
•••
يبيعون السراب وكل رايح له خطاوي جاي
واذا ساوم .. شرى عزّة فقير لطفلته لعبه
•••
وانا اللي وان غدى جلدي غطى والا الحجر مركاي
عزيزٍ ماخضعت الاّ لرب الناس والكعبه
•••
وانا ماني نبي ولا عصى موسى بمثل عصاي
ولاني كافرٍ لا صارت سهامي بلا جعبه
•••
تمدن داخلي طفلٍ عشق رعي الغنم والناي
صدق والله ابوي اللي يقول : المرجلة صعبه
••
محمد الدحيمي