قصيدة للشاعر عبيدالله العرابي

من قبل لاتكتب وتشطب في طلوع وفي نزول
أحيان في قمة جبل وأحيان في بطن المسيل
••••
أبسألك ياصاحبي ؟ يمكن سؤالي به فضول!!
الشعر وش يعني؟ خلاف الحزن والوزن الجميل
••••
وبسألك ليه. الحياه اللي نقدسها تزول
واللي نحبه دون ما سبه تزفه للرحيل
••••
وبسألك وبسألك وبسألك؟ ما أبغى حلول
ودي تحط إيديك فوق الجرح وتداوي عليل
••••
كم من وجيه تمرنا وأنته وأنا يمكن نقول
هذا مثْل هذا .. وهذا غير هذا.. مستحيل
••••
وكم من حروف إنمرها ونذرها تنبت حقول
كريمه حروف القصايد كل ما أتهجى بخيل
••••
سافر على أعماقي تلاقي سحر تهذيب العقول
يالشاعر اللي مالقى في ظل تفكيره مقيل
••••
(والشعر وحي النفس) والشاعر لما دونه رسول
مداين أحلامه براد وغصن زيتون وهديل
••••
(أما الحياه) اللي بها عمرك يطول ولايطول
من حلوها في مرها وتمرها عابر سبيل
••••
الشاعر: عبيدالله العرابي