جانا رمضان الله يجيبه بخير، شهر له طعم خاص، لكن فيه بعض التجار الله يهديهم يستغلون هالشهر وحاجة المواطنين أنهم لازم يشترون مقاضي لاهلهم فيرفعون الاسعار بشكل مو معقول ولا له مبرر، المشكلة ان الاسعار زايدة خلقه، والمشكلة الاكبر والطامة ان الكثير من الحريم كنهم ياخذون نسبة من التجار، يكتبون لستة مقاضي يا دوب تشيلها تريله من كثرها، المدام مجرد ما تقولها اكتبي اللي تحتاجينه من مقاضي رمضان على طول تروح تشتري دفتر سلك عشان اذا غلطت باسم والا شي تشق الورقة تخاف انها اذا شطبت عليه تلخبط انت، كنها تكتب اجابة اختبارات، وبعض المدامات لازم تروح بنفسها تنقي المقاضي لانها ما تثق ان زوجها يعرف بالاسماء والانواع، وبعض الازواج يحب يريح راسه وياخذ المدام عشان عندها خبره بالسوبرماركات وتلاقيها من تدخل المحل تعرف رفوف المقاضي، اكثر شي يقهرك ان المدام تجلس تطالع بكل شي تاخذه كنها تقرا قصة قصيرة، وانت واقف بجنبها ماغير تبحلق بالرف ولاعندك سالفة ولاتدري وش هاللي شاريته المدام، طلع مليون نوع من المقاضي اللي مايعرفها غير الحريم ولو حاول زوج انه يعرفهم مايلاقي خلايا مخ كافية تستوعب هالانواع اللي كل يوم تتجدد كنها اختراعات، تعال شوف اسواقنا قبل ليلة من رمضان وانت تعرف حجم الدوشة!