لازم (مدير)!

غريب تفكير الكثير من شبابنا، أكثرهم ما يحب يشتغل أي وظيفة، كلهم يبون وظيفة مدير أو نايب مدير، وأن ما تهيالهم كذا يبون وظيفة راتبها راتب مدير وهي الحالة الوحيدة اللي ممكن يتنازلون فيها عن مسمى الوظيفة، صحيح أن فيه شباب ما هم لاقين أي وظيفة وراضين بأي وظيفة على الاقل يصرفون على أنفسهم ويستغنون عن الموال اليومي مع اهلهم كل ماجوا يطلبون مصروفهم اليومي، وصحيح أن فيه شباب تفكيرهم يرفع الراس وعصاميين بس ما هم لاقين فرصة عمل عليها القيمة، بس الغالبية من شبابنا ما تدري كيف جاي تفكيرهم، لا لقى له ابوه وظيفه، يقعد يبزوط ويداوم من غير نفس، لأن الاخ عايش دور ان ابوه مدير ولازم يطلع مدير زي ابوه، راتب ثلاث الاف ريال ما هو مالي عينه، من ثاني يوم يداوم راز خشمه وساكب بالشماغ وبس يتذمر من تكييف المكتب والا من التي بوي، نفسه ما هي مطاوعته يشرب الشاي اللي هو مسويه، ومن يقرب اذان الظهر تقوم عيونه تغمض وتفتح من قل النوم وكثر السهر، وتصير اعصابه مشدودة ما عاد يوحي زين، وبس يطالع بالساعة يبي الفركة، ومو قادر يهضم هالمدير اللي ما يطلع الا بعد نهاية الدوام بنص ساعة، ويدور اي احد من الموظفين راعي سوالف عشان يقزر الوقت معاه واذا ما لقى زرق تحت الدرج يكلم، كلهم يبون مدراء!