هب.. ودب

ليش الأمريكان يبون يخوفونا بالمخلوقات الفضائية؟! اللي شاف فيلم مايكل مور فهرنهايت 911.. يطلع بنتيجة واحدة.. وهي أن الأمريكان مخترعين كثير من السوالف عشان يخوفون الناس لأنهم اكتشفوا أن تخويف الناس هي أسهل طريقة للسيطرة عليهم.. فيه دراسات تقول إن الأمريكان تجاوزوا مستوى المخ البشري العادي في جميع المجالات ووصلوا مكانة لا يتخيلها عقل.. بس إنهم (الله يقلعهم) يخبون عننا اختراعاتهم عشان ما نبلشهم بكثرة التطلب.. عطونا.. عطونا.. يوم طلعت طيارة الشبح اللي ما يكشفها الرادار قبل عشرات السنين قال بعض العلماء إن الأمريكان جايبين معدن الطيارة من القمر.. وكل يوم تطلع شائعة عليهم.. يمكن هم اللي يطلعونها على أنفسهم عشان نظل طول عمرنا نتراجف لا سمعنا اسمهم، بس الخوف إن يطلع كلامهم صدق ثم نروح فيها.. لهم أكثر من مِيت سنة.. وهم غاثينا بسوالف المخلوقات الفضائية اللي يصيدونها والمراكب الفضائية.. حشا عصافير ما هي مراكب فضائية.. آخر كذبة.. يقولون إنهم لقوا بالصدفة.. في كوخ يبعد نحو 40 كيلو عن قاعدة عسكرية بأمريكا مخلوق فضائي محشور داخل قزازة كنه مخلل ومصبوب عليه مادة ما ينعرف وش هي.. وترى هالسوالف يا جماعة اللي يطلعونها على أنفسهم عجزنا نلاقي حل لها.. كل اللي قادرين إننا نسويه مع سوالفهم اللي ما لها آخر إننا (نبحلق)!!