الضمان الاجتماعي «زحلطن»!

ما ودنا نزودها على ربعنا لأنهم شوي حساسين، ويزعلون، ويحسون أنك ضدهم، وانك حقود، مع ان السالفة ما تزعل وكل انسان يشتغل في هالمجتمع لا بد يجون ناس مثل حالاتي فاضين ومتفرغين بس ينقدون ولا يعجبهم العجب ولا الصيام في رجب، بس فيه جهات زي الضمان الاجتماعي هذي تعتبر جهات حساسة لأنها تتعامل مع ناس مساكين ولا عندهم واسطات، وبهالمجتمع لا صار ما عندك واسطات كنك تايه في صحراء ومقطوط في صحراء ما لك غير تشرب ماء الرديتر وبالاخير تموت عطش ولا احد جاب خبرك، الضمان الاجتماعي الله يوفقه في شهر رمضان الفضيل جاه دعم من ابونا ملك الاصلاح مليار ريال عشان يستفيدون منها الفقراء ويتقضون مقاضي رمضان وهم مرتاحين، والرواتب الشهرية اللي بالعادة يصرفها الضمان تجي حوالي تسع مية مليون، يعني الدعم الضعف بالضبط ويزيد شوي، بس حقين الضمان ما أدري شلون وزعوها، ناس ما جاهم غير خمس مية ريال وناس جاهم اكثر من ثلاث الاف، مع ان المفروض انك تدبل الراتب وخلصنا، خصوصا ان الدعم كان الضعف، الشي الثاني للحين ما حد عارف عدد الفقراء المستفيدين من الضمان الاجتماعي عندنا، ما ندري هم اسر والا افراد، لأن الضمان مخلي السالفة عايمة، يقولون حنا ندعم كذا «حالة» ويسكتون، الشي الثالث حاطين شرط للضمان انك شايب وعمرك حوالي 57 كن الفقر بالعمر، ولو قوقل فيه نظام يكشف النصابين المستفيدين من الضمان والفقراء الصدقيين المحرومين منه كان شفت شي يشيب الراس!