مناظر ما تسر!

لو فيه أي مسؤول كلف نفسه وسوى حاله مواطن جاي يبي قرض كان عرف أن الدعوة فوضى، وأن الأمور ماشية بالبركة، ناس مساكين تاركين بزارينهم من بعد صلاة الفجر وجالسين قدام باب البنك عشان لا فتح البنك والا هم أول الناس، وهذا حقهم دامهم جو اول الناس، لكن بعد ما يفتح الموظفين على مزاجهم وبعد ما ينتهون من الفطور وتاركين العالم كنهم جراد متكوم على باب البنك، يفتحون الباب ثم تندفع العالم كلهم يبون يدخلون اول الناس، وتعال شف المنظر وتحسر على وضعنا المدحدر، ناس ترقى فوق ناس، ناس تسب ناس، ناس تطالب باحترام البنك لانهم جايين قبل الفجر، معقول ولا فيه مسؤول عن بنك التسليف راجع أي بنك ثاني وشاف الآلة اللي تعطيك ورقة صغيرة فيها رقم دورك وتجي لا طلع رقمك على الشاشة، بعدين كله كوم وبطا شغل موظفين البنك كوم، كلهم يمكن باستثناء واحد كنهم يمشون على بيض، تمر ساعتين وثلاث والموظف ما مشى إلا أربعة أو خمس مواطنين، ما ودنا نظلم البنك، الشي الزين انهم طلعوا لستة أرقام للي مطلوب انهم يراجعونهم عشان تسليم القروش، والخوف انه بعد يصير مثل ما صار من اول وتطلع هالورقة مثل قلتها وترجع الحوسة والمناظر اللي ما تسر لا عدو ولا صديق، الله يفرجها من عنده!