«التقاعد» بلا مصلحة!

كانكم زيي الله يعينكم على تجديد خلايا مخكم دايم، والظاهر ان خلايا المخ زي كفرات السيارة «امحق وصف»، كل ما تمشي عليها كثير كل ما تنمسح، بس احسن ما في المخ انه يختلف عن الكفر في عدم الانفجار والانقلاب واعدام البشرية، مع ان انفجار المخ اخطر بكثير من انفجار كفر السيارة «يا اخي بطل مصالة وخش بالموضوع»، خلينا نسولف وش ورانا، كل العالم تسولف، المهم يا اخوان ماحب اطول عليكم وانتم اوادم وراكم شغل ومصالح ومو فاضين تسمعون هرج يدبل كبودكم والا يسبب لكم ماغص، في بعض الجهات ما تعرف اش اسمها، مرة تقول مصلحة، مرة تقول جمعية، مرة تقول هيئة، عاد كانكم مثلي ماعرف هالسوالف ابد، ابي اتكلم عن الجهة اللي في يدها سوالف التقاعد واموره، اظنهم اسمها مصلحة التقاعد، ربي يوفقهم لكل ما فيه مصلحة للبلد والمواطنين، ودي بس لو ينتبهوا الله يجزاهم خير لمصلحة الايتام اللي يراجعونهم بتقاعد ابوهم المتوفى، بلاش كل شوي طالع كم طفل في جريدة يشتكي من البهدلة اللي لقاها عشان كم ورقة والا كم توكيل لازم يتجدد، مصلحة التقاعد ماهم مقصرين ويحاولون يرضون الجميع، بس عاد حنا المواطنين لاشفنا احد طيب نبغى منه كل حاجة، الانسان الطيب كل الناس تجيه اذا تضايقت، وانتم يا مصلحة التقاعد نعرف ان ما لكم مصلحة انكم تعقدون الناس، والشهادة لله انكم كويسين، بس ارجوكم شوفوا حل لتقاعد المتوفى اللي وراه ايتام!