السعير

يا فلان بن فلتان والدنيا رحاها يستدير
ناس تعلي شانها واخرى توطي شانها
محد(ن) سلم من شر بقعا لا صغير ولا كبير
يا قطعتك بسيفها ولا وطاك حصانها
ما فاز فيها كود ابو قلب(ن) كبر راس البعير
مافار دمه لو بقعا كشرت نيبانها
ياليتني يافلان بن فلتان معدوم الضمير
لا ولعت نيرانها زودت في نيرانها
لكن لي مبدا ولي ساس(ن) على العليا شهير
والناس تبني عزها على صروح ابوانها
شفت وسمعت من الخطايا ما يشيب بالغرير
ولا يذبح شيوخ العرب الا خطا سفهانها
بعض العرب فعايله عندي سوى!! شر(ن) وخير
ماني بحسب زيانها!! وشلون احسب شيانها
وبعض الخطايا تحترق في داخلي مثل السعير
الموت في كتمانها والشر في تبيانها
لكن سيفي ما يعود في نصابه والجفير
ولاني سوات اللي ليا جاعت كلت ورعانها
عبدالله بن فهيد