لأجل الوطن

قصيدة وطنية ألقاها الشاعر ضاوي العصيمي في الحفل الرسمي لافتتاح مهرجان ربيع النعيرية الأسبوع الماضي
ألا يالله بذكر طيّب اليا ذكروا الأجواد
وجملني مع اللي شرفوني بالثقه فيّه
أنا حاضر لميقاف الشرف في كل حين وماد
تعودت أصعد المنبر على سلم قوافيّه
وعلى شان الوطن شاش القصيد الجزل والقصاد
وقمت اختار من عذب الطواريق الحماسيه
مطانيخ القوافي جت تداحم لي على الميعاد
مغير أنقى وافاضل بين هاذيه وهاذيه
انا لاجل الوطن حاضر قريحه والحروف جداد
شذاها مثل فواح الزهر في وسط محميه
وطنا عشت شامخ ما تطولك هقوة الحساد
صمودك من تضامنا ولحمتنا المثاليه
بفضل الله ثم سلمان عاش الامن فيك وساد
حكم بالعدل والحكمه وقال الدار مرعيه
ملكنا الحازم الشهم الحليم اللي بجوده جاد
ولفتاته لشعبه كلها حب ومحنيه
مثل عبدالعزيز ومثل اخو نوره من الاحفاد
محمد راعي الرؤيه ونهضتنا الحضاريه
ولي العهد حلال الصعاب مكمل الامجاد
وقف وقفة شجاع وكل وقفاته اصلاحيه
بفضل الله ثم فضل القياده كل حقٍ عاد
على اصحابه وعشنا في نعيم وفي رفاهيه
وحنا من هذا المنبر نجدد بيعة الاجداد
ونسد الباب في وجه الشعارات الضلاليه
جنود في الحدود موجهين النار للاضداد
صناديد الرجال اللي شجاعتهم وراثيه
وحنا لا دعى الداعي لهم عزوه وجيش اسناد
عزيز نفوسنا فدوة ترابك يالسعوديه
بلدنا الله حباها خير ما يوجد بكل بلاد
ونحمد ربنا على الكرامات اللاهيه
ومن شرق الوطن باسم الامير سعود كالمعتاد
نقيم بكل عام المهرجانات الثقافيه
نغني في الوطن وتراثنا والعلم والرواد
عسى ربي يبارك في جهود اهل النعيريه
تبنوا مهرجانٍ عالمي عن كل وصفٍ زاد
فعالياته تنافس فعاليه فعاليه
على شانه ثري جاته جماهيره بلا عداد
من ارجا المملكه جو له والاقطار الخليجيه
يرحب كل يوم بمن يزورونه اسر وافراد
ويلقون البرامج فيه شعبيه وعصريه
ونوادي للادب والمعرفه والشعر والانشاد
ومنابر توعيه للجيل وارشادات دينيه
وترفيه وملاعب للشباب وقسم للاولاد
تنظمها لجانٍ مشرفه ولجان فرعيه
شعاره مرحبا والضيف يفرش دربه بسجاد
وتنظيمٍ خرافي وابتكارات احترافيه
فريد وصار للسواح مقصود وهدف ومراد
ومن زاره سنه في كل عام يكرر الجيه
لو اسهب ما قدرت اعدد اللي شفت للنشاد
تميز واستحق يقال له ميه على ميه
ومن يبغى الفوائد يحضره ما له عنه مقعاد
ليا زاره يبي يرجع مكاسيبه خياليه
ومن كل الحضور الرايه البيضا على الاشهاد
تعبر عن رضاهم والشكر لأهل النعيريه
ضاوي العصيمي