نرجسيّة

يازماني كيف تجرحني بلا ذنب وخطيه
... ... ... ليه تجرحني بلا ذنبٍ جنيته يازماني
ماجزاي الا اني اجزا راعي السيه بسيه
... ... ... كيف اجازي سية المخطي عليه بالحساني
الزمان يكون ايام الليال السرمديه
... ... ... الليال اللي بها من حب محبوبه يعاني
والبلاحب الهنوف اللي لهاتسعين نيه
... ... ... الحبيب اللي بليته في زماني وابتلاني
الهنوف اللي كما قال الحداثي نرجسيه
... ... ... نرجسيه وابدويه غانيه ست الغواني
الله اكبر جمعتها نرجسيه وابدويه
... ... ... فاتنه وبزينها ينزال عقل المودماني
عمرها ماحطت المكياج والوان الشفيه
... ... ... عندها نار الجحيم وعندهابرالاماني
اجتمع في وصفها جنه على نيران حيه
... ... ... جنته فيها النعيم وعود من ناره كواني
واجتمع فنجال مع فنجال دله شاذليه
... ... ... فيه من نهر الفرات وثلجة القطب اليماني
واجتمع ليل ونهارونور شمس وظل فيه
... ... ... ونارها مع ثلجها صارت سوا مثل الخواني
واجتمع في وصفها سكر ونخله سكريه
... ... ... الثبات من النخل واللين عود الخيزراني
بنت شيخٍ مايهاب الموت والدنيا مديه
... ... ... وان بغاهاعشر عمر العشر ماترجع ثماني
حبنالوينوصف غطا على حب البريه
... ... ... حبناياللي تعرفون المحبه شكل ثاني
ويش عبله ويش عنتر ويش ليلى العامريه
... ... ... ويش قيس اللي هوا ليلى ومات من الهواني
ميتٍ فيها غرام وهي غرام تموت فيه
... ... ... واجتمع في حبها مع قلبي الهايم لساني
كل عضوٍ في هواها قام يلعب سامريه
... ... ... وان زعل يزعل دقايق ثم يرضى في ثواني
والوكاد اني سنافي هيبتي دايم قويه
... ... ... ليه يوم اطيعهافيماتريده وتعصاني
مستعد ارمي بقلبي في البحر وارفع يديه
... ... ... عن جميع اللي يوطي هامتي والعمر فاني
ماضريت اهز راسي واترجى اكبر عطيه
... ... ... رافعٍ يمناي وامشي مع ذريفين اليماني
وان هرج بي في قفايه ماعليه ماعليه
... ... ... وان هرج قدام وجهي يحتمل ضرب السناني
وان بغاها طيب يبشر وان بغاها عنجهيه
... ... ... دايم البادي هو الجاني وانا ماني بجاني
المهم اني نويت اجازي السيه بسيه
... ... ... وادري انه فيه سياتٍ تجازى بالحساني