وقفة صفاء

انس البشر واجلس مع النفس ساعه
وقفة صفاء . ماهيب صدة هزيمه
خل العتب للنفس عندك قناعه
تصبح بنقد الذات راعي قديمه
عليك بالتقوى . وحفظ الوداعه
الدين له مبدا . وللحق قيمه
ادّ العمل واطلب وراه الشفاعه
مثل الحيا سيلٍ تقفاه ديمه
واحذر تجرع ذنب من باب طاعه
لاتطلي الجرباء . وتعد السليمه
وتجارب الدنيا ضناها طماعه
والآ الفرص تولد وهيّه عقيمه
ومن جاز من عقله . وجرّد ذراعه
هذاك متعافي . ومخه سقيمه
والحلم مايسوا بليّا شجاعه
والراي مايجدي بليّا عزيمه
واللي يكلف شخص خارج طباعه
ذا يركب البحّار فشداد ريمه
ومن شفت نصف الناس عنده جماعه
انظر عداه وتعرفه من خصيمه
ومن تجهله من ناس عطها الوقاعه
بالك تزكيها . وحذرا الضليمه
وان ماحمى البيت العريض ارتفاعه
والآ ترى في كل بابٍ خريمه
وان كان بعض الهرج كثره نطاعه
الصمت في بعض المواقف جريمه
والعمر كنزٍ . قد كتب لك ضياعه
تفعل وليمه . وانت نفسك وليمه
وقبل الفنا خلّك بكل استطاعه
احجاجك يهلي . وكفك كريمه