صوت الصورة

ترفع وخيتها تبي تاخذ ألعاب
فكرة وتمت مع نجاح وسهوله
ما عندها إلا واحد يدور كتاب
والرف عالي لوحدها ما تطوله
سعود بن عبدالعزيز الهزاع - نعام
شافت كتاب ودها اليوم تقراه
ولا لقت غير أختها من وسيله
زمت وشدت له يمينه ويسراه
واللي يبي الطولات يرقى الطويله
سعد الحماد - روضة سدير
أطفالنا صاروا ضحايا للألعاب
حبٍ عجيبٍ انظروا للصغيرات
طبيعةٍ فيها المخاطر والاتعاب
نتيجة الاهمال وكثر الدعايات
محمد عبد العزيز الخنيفر - أشيقر
بنتٍ صغيره بس فيها الذكا نوع
جابت لها فكرة صعيبه غريبه
تبي لها شياً على الرف مرفوع
ترفع زميلتها تطول وتجيبه
عقلا خزن العنزي - تبوك
ليت التساعد بينهم صار تبديل
منهو يشيل الحمل ما ذاق راحه
البنت تعبت وأختها تريد تطويل
واليا تعدى الحد يسهل مطاحه
سعد بن ناصر المسفر
ترى التعاون فيه للنقص جبران
والى قْصرت يدْك بيد اخوانك تطول
شف البنيه لختها صارت حصان
وحصلن غايتهن بفضل العقول
وكم رجل انكف من دون اعوان
واستسلم لياسه ولادوّر حلول
عبدالعزيز الصالح - حائل
الطفل شال الطفل من شان لعبه
حب التعاون بينهم ما نملّه
تكاتف الأطفال شيّن نحبه
والتقنية فيها سلوم مخلّه
ريان محمد الخنيفر - الرياض
لحظة باشوف اللعبة اللي جميله
تحمّلي أرجوك لا تتركيني
ودّيبها لكن ما فيه حيله
باقي عليك شوي وتنزليني
بشائر القحطاني - الرياض
صورة العدد السابق
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
ونرحب بما تلتقطه عدساتكم
من الصور النادرة والطريفة