نبايعك يا شيخ شيب وشبان

قرار أبو متعب مصيب ولاهان
هو صاحب رأي الشعب والكل شايف
ما مات نايف عقب تعيين سلمان
دام الخلف سلمان ما مات نايف
استبشروا يالشعب في كل الأوطان
بوديانها وسهولها والمصايف
والحمد لله توج الأمن بأمان
مادام فرحتنا بشهم الوصايف
أبوفهد يشبه سهيلٍ ليابان
نوره شعق فوق الجبال النوايف
يشهد له التاريخ في ماض الأزمان
وبأشهد وتشهد له جميع الطوايف
خمسين عام خدمة الشيخ برهان
ولا يحسب للتعب والكلايف
بخدمة شرف الإسلام والدار مشتان
وليا عطى ماهوب يلحق حسايف
ياما قضا المديون من جور ديان
وياما اعتق رقاب وفرح ولايف
مبروك يا سلمان مبروك ومعان
بولايتك للعهد ما طاف طايف
على الحرم واللي يصلي بالأركان
ومافي الوغى ترفع رقاب الرهايف
ونبايعك يا شيخ شيب وشبان
رجالنا والمكرمات العفايف
يالله يا المعبود ياقاضي الشان
ياضامن رزق السنين والعجايف
انك تجازي فاعل الخير بإحسان
اللي صروف الوقت عنده خفايف
عطاه ربي حلم والصبر ويقان
ومؤمن بتقدير القضى بالصحايف
يصبر على دورات بقعا بالايمان
ولا هوب مما قدر الرب خايف
حراً لليامن تعلوى بجنحان
صيده جزيل ولا يصيد النحايف
وما غرد القومري على رؤوس الأغصان
صلوا على المعصوم عن كل هايف
شاهر بن محمد الهامل القحطاني