نوض براقه

عسى البارق اللي في عروض السحاب ينوض
من العصر الى عقب العشاء ما فصل نوضه
يواصل ويشبك حدريٍ علويٍ عروض
ويجي كانه جبال من الثلج مقضوضه
على نوض براقه تعد شجرات الروض
وتشوف الشعاب تدفق الماء على الروضه
فليا مننا قمنا على وقتنا المفروض
نصلي الصلاه اللي على الناس مفروضه
وليا والله ان الروض من فضل ربي حوض
وعرقٍ يرده ظاهرٍ فيه الى عروضه
وفتحنا الشناط وحملو عفشنا المنفوض
على شان عاد ونيتنا ما نشف حوضه
وركبنا الجيوب اللي تخوض المناقع خوض
ومن ناش منها الارض يا معجل نهوضه
ليا وقفت مثل الظبا في الرميض ربوض
وليا دبرت بالعين ماهي بملحوضه
عليها مداغيش كفو قيمين حظوظ
ومن فالها حتى على الصيد محظوظه
ولا منهم البلشه ولامنهم المبغوض
ولا اللي بليت بخوته وهي مبغوضه
ولا ناقل النمه ولا الرافض المرفوض
يرفض ما سمع واشواره العوج مرفوضه
ولا عاق والدينه ولا سئ الملفوض
ولا راعي الشكات في كل ملفوضه
ولا اللي لسانه في قفي الغيب قاروض
يده قاصره ولسانه تقول قاروضه
ولا الحاقد اللي قلبه من البلا ممروض
لا جاء الطيبين وذكرهم جاته إحموضه
ليا جاء مع الاقصين الى سكره مخفوض
ومع بني عمه ماخذ سكره موضه
هاذولا ليا افتكيت من قربهم محظوظ
ونفس الفتى عن موقف الهون موعوضه
لو تمسي تهش الهوش وتلاطم الباعوض
وعرضك ما ناشوه وكرامتك محفوظه
علي الحرام انها بباقي الامور تعوض
ولا قولت حلوى لكن فيه ملحوظه