لك محبه يا فقيد الشعب تجري بالوريد

الرثاء وش عاد ينفع بالقصايد لو تزيد
والدموع اليا استهلت ما وراها من حصيل
لو يرد الشعر مثله مابخلنا بالقصيد
والمدامع لو تعيده سيلها غِرّق بسيل
القدر ما منه مجزع والأماني ما تحيد
حكمة الله في عباده جيل يفنى بعد جيل
لك محبه يا فقيد الشعب تجري بالوريد
يا حكيمٍ قاد شعبه فوق بحر المستحيل
يا كثر لو جيت أعدد ما طرالي من جديد
بالفكر زحمة مفاخر من فعل ماله مثيل
لكن أني قلت أببدا لأجل آتي بالمفيد
عند آخر كلمةٍ له مالنا عنها بديل
قالها صقر العروبة كلمةٍ والله شهيد
نابعه من قلب مؤمن حس في قرب الرحيل
كنه أعطى في وصاته زبدة الهرج الأكيد
أذكروني في دعاكم رحمة الرب الجليل
لا وربي مانسينا في دعانا لك نزيد
والدعاء لك يا فقيد الشعب من رد الجميل
يالله انك تعلم أنه يتبع النهج السديد
تابعٍ نهج الصحابه لا يعيل ولا يميل
ويالله انك تعلم أنه بالعفو نوعه فريد
وإن جوده مثل مزنٍ بالوسم يهمل هميل
وأن فيه من التواضع حكمة العقل الرشيد
قايد محنك سياسي كلمته سيفٍ صقيل
ويالله انك تعلم أنه شيك مفتوح الرصيد
للفقير ولليتاما والعَجَز وأبن السبيل
أغفر ذنوبه وهب له من عطى فضلك و زيد
وادخله جنات عدنٍ فْيّها ظلٍ ظليل
يالله أنه ضيف عندك وأنت رحمن العبيد
الدعاء منا لعبدك والعطا منك الجزيل
محمد حلوان الشراري