أهديتني جمرة

ثلاث تحكمني ولا قلت وش لون
المعرفه .. والعاطفه .. والجبلّه
العقل صاحي لكن القلب مجنون
والكلّ منهم نظرته مستقلّه !
يا صاحبي ما للمحبيّن قانون
والحبّ لغز .. ولا عرفنا نحلّه
قلبك مثل قلبي مكبّل ومسجون
أحرار مير قلوبنا مستحلّه
عسى الغلا لازال بالحفظ والصون
والله يبيحه لا تغيّر محلّه
أهديتني جمره على راس غليون
وأهديتك من العمر شيحه وفلّه
ورغم اختلاف المدّ لا زلت ممنون
والشوق يآخذني على كلّ ملّه
فوّحت دمّي لين صار أشقر اللون
وأخذت من مجراه فنجال دلّه
دايم ضحايا العشق لإجله يضحّون
كم فاض من كثر الضحايا سجلّه
وأنا غديت بحكم فاتن ومفتون
راضي بحكم الحبّ .. والحكم للّه
وأن قام يكبر بيننا شاسع البون
أرفق عليّ وشاسع البون قلّه
عز الله أنّ الشكّ ماهوب مامون
سيف الجفا البتار يمكن يسلّه
أقنع لو أنّ الحال من دون في دون
وأخذ الكلام اللي عليه الأدلّه
لا تشتكي لي والعرب وش يقولون
شكوىً لغير الله تراها مذلّه !