دولة المجد

مبتدانا باسم رب الكون خلاق العبيد
خير ما قلنا كلام نذكره في مبتداه
دولة الخيرات والمعروف والمجد التليد
دولة آل سعود ربي عزها بعالي سماه
عزها بدين قويم راسخ اتباعه تزيد
وبيت لمليار مسلم يتجه له بالصلاة
عزها بمسجد نبيه واصل اجذوره بعيد
عزها بصقر الجزيره طيب الخالق ثراه
وحد اتراب الجزيره وانتظم عقد فريد
ساسه الدين القويم وشرعه اكتاب الاله
جاهد بسيفه وعقله لين سلمها بإيد
استلمها سعود ثم الفيصل وخالد وراه
واستلم فهد البلاد وقادها بعهد مجيد
قادها بعلم الملوك وساسها بعدل الولاه
لاجلها قدم سنينه كلها بجهده يشيد
دولة يعجب تطور شعبها حتى العداه
نهضة بشتى النواحي ابتدت عصر جديد
تسبق الدنيا بمراحل في ميادين الحياه
فهد في دنيا العروبه عقل مع راي سديد
عقل له ثقل كبير بوقت ما توقف رحاه
موتته صدمه تعز الشيخ والطفل الوليد
كل مسلم في بقاع الارض بدموعه بكاه
صدمة للشعب كله بعد ما غاب الفقيد
نسأل الله الرحيم لفهد عفوه مع رضاه
والقدر نافذ ورب الكون يفعل ما يريد
واداري ان الشعب لو هي كانت بيده فداه
واستلم حكم البلاد الشهم لطام الضديد
الزعيم اللي تسامت سيرته عز وجاه
الحكم مثل الجبال الراسيه حمله كويد
والجبل ما كل شخص شافه بعينه رقاه
الزعامة جت لعبدالله مطيعة دون قيد
الزعيم الملهم اللي لا حزم أمر مضاه
وانقضى عام ابتدينا فيه بالعهد السعيد
اشرقت شمسه ونور في سما شعبه ضياه
فارس الفرسان سيفه يكسر عناد العنيد
فارس تبهر صفاته من سمع فيه ورءاه
هو مليك العرب ربي يرزقه عمر مديد
وفقه يا رب، وانصر دولته سدد خطاه
يا ولي العهد يا سلطان يا نعم العضيد
ذاك ابو خالد ملاذ لكل من وقته بلاه
جودك اللي لو يبيد الوقت لا يمكن يبيد
بحر غطى كل ساحل تغرقه موجة صخاه
بامرك الجيش السعودي والخطر لو هو شديد
يفتدي ارض الرساله كل قطره من دماه
يا بلادي في سمائك تقصر انفاس القصيد
ترسل النظرات حيرى ودها توصل مداه
يا بلادي اعزفي للمجد ألحان ونشيد
وارفعي للعز راية تخفق بعالي فضاه
كل يوم بحب شعبك تفرحين بألف عيد
شعبك اللي يبذل الأرواح ما يوقف عطاه
يسقي الارض العربية دمه وروح الشهيد
وعقله واسمى شعور بعاطفه قلبه حواه
واختام اسأل الله إله الكون خلاق العبيد
اساله والله كريم ما يخيب من رجاه
اسأله امن وامان وسلم مع عيش رغيد
واسأله تحرير قدس المسلمين من الطغاه