منار الجيش

بدينا بسم من يحصي سوايا عبده بمثقال
إله لا ستدار الوقت كل الخلق تلجاله
بعد ذكره نخص اللي وصلنا يطوي الأميال
يشوف الوضع في أرجاء حصونه ويتعناله
هلا يا منور الحفل الكريم وطيب الأفعال
تراحيبٍ نسخرها لجل حضرتك منهاله
نعم غنيت في شوفك وارددها وفاء وإجلال
مشاعر شاعرٍ فاضت شرايد فكره وباله
لجل خالد اببدع له قصيدي واعسفه واختال
منار الجيش ما نحصى عطاه وافر اعماله
حكيم لا صطفق خبث العدوا يارد وهو حلال
يكيل المعضله ما يختلف.. كيله.. ومكياله
له بيوم الوغى.. وقفه.. وله بصمه.. وله تمثال
دهات الخلق.. كل الخلق ما ترجح بمثقاله
هلا بنسل المليك اللي تزعمنا بطيب ونال
ولانا من بعد مشرق وشع النور بقباله
وجددنا ولانا للمليك اللي خلفه ارجال
نقل حمله عقب ما قفى وغاب لا أكبر اعياله
وعشنا تحت رايتكم لنا فوق القمم منزال
نهوم اعلا صروح المجد ونوقف على جاله
مليك تحت قول الله يقف خشيه ولاء وإذلال
وحنا طوع ما يامر.. ننفذ كل ما قاله
على رايه توحدنا ووحدنا صفوف ابطال
عزومٍ لو تبي سطح القمر تصعد وترقاله
نعم يالمملكه عيشي رخا وامن وامان وحال
جميع شعوب هالدنيا تمنى يوم ميصاله
وعبدالله ولي العهد لا قال الصميدع قال
صليب الراس لا سمعه يذل وتقصر احباله
توكل له صعيبات الامور العوص بستعجال
يجي رايه هو الراي السديد مداوي الحاله
وأخوه النايب الثاني سفير الخير والاجزال
بحر يعطي ومداته حمدها كل من جاله
وقف للجيش ابو خالد ومده بالمنار وطال
شواهيق الفعول اللي رسمها القرم في باله
حفظكم ربي الخالق لنا عز وذرى وظلال
ملوك خصكم ربي بنور الملك واهلاله
وابذكر شرذمه فيها حكينا يالنشامى طال
ابذكرهم يا بو فيصل بدون اسهاب واطاله
الا يا طغمةٍ دب الجهل فيها وصال وجال
وعلى حضن حضنها تبرم الصفقات محتاله
عقول ما سكن فيها سوى خبث وغدر واخبال
ونفس عقب طاعتها لربي.. طاعت احثاله؟
لقوا شخص ضعيف وستغلوا ضعفه استغلال
وعلى درب الهلاك اركوا عليه وشدوا احباله
على شكله ومن شكله يجيك امع الحثال حثال
تتب ايدين من خطط.. ومن نفذ.. وسوى له
انا عندي لها الناكر يدور براسي اله سئال؟
زعيمك ليه ما فجر لفكره نفسه وحاله!
اهو وشلون يرضى انك تموت وهو بعد ما زال!
على وجه البسيطه يكنز من المال لعياله
سفيه من ورى الشاشه يثير من النباح جدال
يحسب الناس في غيه تلد ولا تهاله
اهو ما يدري انا بالولاء تضرب بنا الأمثال
نموت ولا نخذل العود وأبناء العود وارجاله
الا يابن الوطن حذرى ترى فيك الامال آمال
تراك انته بعد ربي ظلال الدار واجلاله
ابد لا يخدعك حاقد ونذل باللحاء يحتال
الا تكرم رجال الدين عن ميه من اشكاله
ترى ايت سعودي يحمل ابجيبه سجل احوال
ترى هذا هو اسلاحه.. وهو رمزه.. وتمثاله
يلوذ عن الوطن جازم وهو للكايده فعال
اذا صاح الوطن ينخى يجيه بنفسه وحاله
الا يا أرض الرسول اطهر ثرى في هالمدى وارمال
حفظك الله وبعد الله.. جنود الفهد.. واشباله
هذولا اللي وقوف الها الرجال المخلصين اشبال
على درب مشوا يمشون رجليه وخياله
هذولا للوطن درع يضد المعتدي لا عال
سيوفٍ جندت للدين.. ثم الفهد.. واحلاله
رجال عن حدود الأرض ما تعرف حكي وجدال
إذا شانت نوايا القوم جتك بنفس مختاله
تباها في مواقفها وترسم للوفا تمثال
تنصى المعتدي وتزيد في.. غبنه.. وإذلاله
تعلمنا عن تراب الوطن نرخص حياه ومال
نصون أرجاه ما نرخص ولا ذره من ارماله
تعلمنا فنون الحرب واكملنا الدروس اكمال
لجل يوم يجي نوه يحن ويرزم اخياله
قسم باللي علينا أنزل تبارك وانزل الأنفال
نموت ولا وطى الباغي ثرانا يوم بنعاله