كلنا للوطن درعٍ حصين

يا بلادي.. وأنت لك في خفا قلبي (بلاد)
معشبٍ.. لو المطر ما يجيه بكل حين
زاهي ما بين و(ديان) و(جبال) و(حماد)
معطرٍ ريضانه ب(ريح ورد) و(ياسمين)
يا بلادي لو.. ما شلت حبك فالفؤاد
يمكن إني ما أعرف الشوق، وأسباب الحنين
ويمكن إن القلب ما يدري إن (أعظم) وداد
في وداد الأرض لو كانت.. (اتراب وطين)
والدليل اللي ما عقبه كلام ولا مزاد
حب مكة ف(التفاتة)رسول العالمين
يابلادي بيننا بالوفاء (ملحٍ وزاد)
ولا يخون (الملح والزاد) غير الخايبين
سوّد الله وجه من: يستحقون السواد
وبيّض الله وجه من: جوّد (الحبل المتين)
واعتصم في (حبل) ما فيه فرقه وانفراد
وانفرد في (طاعة الله) و(ارضا الوالدين)
والله إنّا نعرف الدين ونعرف الجهاد
من متى كان (الجهاد) ب(هجاد) الآمنين؟؟!
من متى كان المجاهد (يصلح) ب(الفساد)؟؟
من متى كان المجاهد يجاهد مسلمين؟؟!
كيف يهدي الناس رجل إصبعه على الزناد؟!
التسامح وين؟ والموعظة بالحسن وين؟؟
ويش يعني دين الإسلام غير الانقياد..
للولي، وهداية الناس ب(الحق المبين)
لكن اللي شبّوا (النار) للفتنه.. عناد
يوقظون (الفتنه النايمه) متطوعين!!
حطوا من أجسامهم للفتن (جسر ومداد)
لين صارت قبضة الأمن فيهم.. قبضتين
قبضةٍ لو تمسك الجمر يتحوّل رماد!!
وقبضةٍ لو تمسك الرأسي القاسي.. يلين
(انحراف الفكر) كم يعمي اقلوب العباد
شوف وش سوّوا جدود اليهود الأولين..
حرّموا (دم البعوضة) ديانه واجتهاد
واستباحوا دم مجموعة من المرسلين!!!!
والحقيقة ما به أحداً من الشر استفاد
والحقيقة كلنا للوطن (درعٍ حصين)
يا وطنا كل (حب) ايتغيّر.. والوكاد
إن حبك في هوى اقلوبنا (فطره ودين)
ايتجدد كل ما صار منا بازدياد
مثلما الشمس اتجدد بدورات السنين!