عبدالله بن مدوس الدوسري

غاية الروح

علي ما رديت يا غاية الروح
مدري زعل ولا بداية قطاعه
عليك قلبي من عنا الحب مجروح
والحال كني عايشٍ في مجاعه
اسرح مع أفكاري على نغمة النوح
وأبحر مع همٍ كوتني وجاعه
ليلي طويل هموم وافكار وجروح
وصبحي عنيدٍ لابداء فيا شعاعه
أكتم عذابي داخل الصدر ما بوح
سري أسير امانتي والوداعه
ما ودي أبدي السر واصير مفضوح
لناس تزيد بكذبها والاشاعه
عطني جوابك دام بي باقيٍ روح
قلبي ملكته بحكمتك والبراعه
ان كان عليك اخطيت ما نيب مسموح
لاكن بنطلب عفوكم والشفاعه
قول السماح ومن خطاياك مدموح
واطلب رضاك العمر واقول طاعه
أنت الذي لك دمي اليوم مبيوح
أقولها وعندي يقين وقناعه
وان كان جافي مالنا فيك مصلوح
مانيب من يشري من الناس باعه
أبغي الصراحة بصدق واخلاص ووضوح
مستقبلي لا تصير سبة ضياعه