العيون السود

منها صابني رمح المطني
استحلن عرش قلبي واودعن الجسم بالي
يوم لديت النظر صوب النواعس وأذهلني
لا قدرت أنطق جواب ولا قدرت القي سؤالي
بالتغنج من سهوم الموت الأحمر صوبني
النواعس قتلها للأبرياء شيء حلالي
آه لو إن النواعس للمولع يرحمني
يارد العطشان ويصدر من الجم الزلالي
وذي عوايد من رماه الحظ يرجع للتمني
والتمني ساسها مبني على جرف هيالي
يا كحيل الطرف يا غضِ بعد شوفتك كني
من ذهولي دارج عقلي على حد الهبالي
بالتغني والتدلل ما أحد غيرك فتني
لابسِ تاج الجمال وزاهيِ فن الدلالي
لو بنات الفكر شرّد لجل عينك طاوعني
مار وشلون أوصفك وأوصافك تفوق الخيالي
القصائد بالمكايد والشدايد يتبعني
كل ما هاضت شجوني جاتلي في شف بالي
وأنت شعري فيك من دمي وحبك ممتحني
والغلا ذباح للأرواح مار أرفق بحالي
يا مناتي ياغناتي وأنت ذوقي وأنت فني
أنت كيف الراس بين الناس الأقصى والموالي
ساع شفتك ضعت في دلك وضاع العقل مني
الله أكبر يالله أستر ضعت ما أدري وش جرالي
قبل أشوفه والله أني عشت طيب ومتهني
وبعد عرفه بان صرفه وقتي القاسي ومالي
بس اهوجس بعد ما شفته وأفكر به وأغني
لو يغيب أتذكره وأتخيله كنه قبالي
والنتيجة صار شر الزين لي والخير عني
والخطر قدام مخفيته لنا سود الليالي