في ربيع البر للحسن ميعاد جوّه وسيله مع خضاره والأزهار مشهد جميلٍ فيه سجّه.. ومقعاد يا زين شوفه كاشفٍ كنه الأنوار أرضٍ خضار وفوقها المزن رعّاد محلى بها فنجال مع شبّة النّار وروعة طبيعه مُلهمة كل قصّاد نسايمٍ عطرة بختري.. ونوّار من زارها لا بدّ من حسنها عاد برفقة نشامى جنب يمناك ويسار وليا نشد عن موطن الحسن نشّاد موطن جمال وأهلها صفو الأخيار سعود عائش الحربي - جدة للطبيعه سر بِنْفوس البشر في محبّتْها تعلق كلّ حَي تنعش إحساسٍ ويسْترّ النظر عيد محزونٍ طواه الهم طي منظرٍ ينسي مشاهِدْهِ الكدر بين عشب وبين زهر وشوف مي للرعود أصوات معلنةٍ خبر والبروق تلوح بِشْعاعٍ وضَي وبالسما غيمٍ تكرّم بالمطر ساقه الله غافرٍ ذنْبٍ وسَي يا عسى غيثه يعمّ بْلا ضرر يجعله سقيا بها رحمه ورَي يا نَجِد جوّك لنا والد أبَر ما نقصنا في ربوعك أي شي ناصر جمعان آل عوض - وادي الدواسر من فضل ربّي ربعت كل الاوطان تنفلت كل الرياض ابزهرها السيل وافر في شعاب ووديان هذي سحابة وأختها في اثرها وبشيّة الله نلقط الفقع لا زان نفرح وكل في ديا ره حفرها علي الرشيد - رياض الخبراء السيل في جيّاه تفرح به الناس يفرح به الشاوي وراعي الحلالي ويسقي فياضٍ وضعها كانت إيباس شرق وجنوب وغرب وأيضا شمالي خالد ناصر المخيمر - روضة سدير مع طيحت الامطار ارسلت عسّاس وجاب العلوم الطيّبه ما تونّا لقا ربيعٍ طيّبٍ ماله اجناس عم الوطن والسيل منّا.. ومنّا والأرض خضرا تشرح النفس ياناس لا شافه المشتاق هجين تمنّا في منظر ياناس ينومس تنوماس ومن شاف زهره صار ينشد وغنّأ خليف فهيد الحربي - الرياض الحمد للي يرحم الناس وحدّه منزل حقوق الغيث ديم وهتّان سالت شعاب وكل وادي بحدّه وعم المطر نفد وخباري وضلعان وين انت ياللي يسلب الجو ودّه ووين انت ياللي ترقب العشب ولهان في هالسنه كلٍ ترى فاض سدّه من وين ما يممت كاشت وكسبان العشب يضحك والشجر كن ودّه يسجد شكر لله سبحان.. سبحان اكشت وكيّف واحذر يجيك ضدّه وبالك خراب الأرض يافلان وفلان عبدالكريم النغيمشي - لوذة السيل يجري وكثر الاشجار حوله وترى الحذر مطلوب بابعاد الاطفال الكل يفرح بالمطر في نزوله والبعض يلهى للاسف فيه الاهمال البُعد مطلب والحذر في دخوله واجب عليكم احذروا كل الأحوال محمد عبدالعزيز الخنيفر - أشيقر السحاب مترادم فوق متنه بروقه الرعد فيه دنه والفضاء منه ضايق والمخيل متخايل وافر في حقوقه حدر الوادي اللي من زمانه تشايق لا تصافق بسيله الهبايب تسوقه يسقي الدار من سيل عريم غدايق الله اللي يجيبه من مزون صدوقه وعامنا عام ريف من مناظر وثايق حمد عبدالله الوايلي - حوطة سدير يا هي لوحة ما خطها ريشة الرسام ولا لونوها بالقلم.. والتلاوين لك الحمد يا ربي قيامٍ وصيّام سالت فياضٍ مجدبه عدّة اسنين لطيفة بنت محمد بن مطرب - القرينة يا ناس لاجا السيل عندي رساله ترى الحذر مطلوب لا تدخلونه يخلي عياله دايمٍ في خياله دايم امامه دايمٍ في عيونه عن فلذة الاكباد لا تصير داله ترى الحذر مطلوب ما تجهلونه ريان محمد الخنيفر نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى: [email protected] ويا هلا.. صورة العدد (عدسة/ حسن المباركي)
