للغيث فرحه في قلوب البشر غير رحمه من الرحمن يسقي عباده منظر بديعٍ فاق كل التعابير يضفي على النفس العليله سعاده رحله سعيده .. وانتبه للمحاذير ياللي نوى الطَّلعه وجهَّز عتاده لا يفتنك زاهي الزهور النواوير ولا يسحرك جوِّ الربيع وبراده ناصر جمعان آل عوض - وادي الدواسر لا روح الخير في القبله ولج رعاده والبرق له لمعةٍ في مقدم نصوبه واليا تروس على الخلجان بركاده قامت تلده رياح الشرق مصحوبه ثم رش وبله غزير الطش وزياده يجيك سيله على الوديان بعذوبه والغيث خيرٍ من الله لا وقع فاده الارض تنبت من النوار وعشوبه حمد عبدالله الوايلي - حوطة سدير الحمد لله يوم هالخير جانا أروى الرياض وسالت اليوم شعبان أمطار .. وسيولٍ .. وخيرٍ لفانا السيل يمشي والمطر جاك هتان وقت الوسم هذا .. وهذا منانا الارض تنبت خيرها تقل بستان مكشات حول الماء يزيد بهنانا لاصارت خيامك على جال غدران عثمان إبراهيم الرشيد - الرياض حيّ السحاب اللي ترزّم من الغرب حيّه وحي البارق اللي سرا به نور البرق في داخله تقل كهرب هل وتنثر ما طره من سحابه تملّت الغدران وأزهر به العشب لا وهني الكاشت اللي مشى به خالد ناصر المخيمر - روضة سدير يا رب يا مسقي العطشان اسق البلد خير من فضلك جعل المطر يسقي الوديان اللي غبرها غدا خلفك لاشلت عفشك على الصمان واللي معك ربع تفرحبك يا رب عفوك مع الغفران وأمن البلد رب لا تهلك عبدالكريم النغيمشي - لوذه السيل جانا والفرح عم الأقطار يا مرحبا بالسيل ساعة حلوله والأودية تجري غزاره بالأمطار وللآدمي قلنا .. وكلٍ يقوله ترى الحذر مطلوب عن بعض الأخطار والسيل فيه الخير حزّة وصوله محمد عبدالعزيز الخنيفر - أشيقر ياليت توصف وين ذا البر والسيل ان كان انصب خيمةٍ عند واديه غيثٍ نزل من غيم مظلم تقل ليل مشت به الوديان للنبت تسقيه الارض خضراء كنها رسم تشكيل ريحة نباته لعطر باريس يلغيه سعود عبدالعزيز الهزاع - نعام جانا المطر والخير عم الجزيره والحمد للمعبود وما أحلى السلامه والأودية يا ناس والله خطيره واحذر ترى الإهمال فيه الندامه والوادي أحذر في نهار المطيره لا صرت حوله كم تشوف الملامه ريان محمد الخنيفر يا ليت منهو على السيل مع ر بعه اللي يودّونه والدلّه اللي طعمها هيل والبن توّه يحمسونه برقٍ تشوفه توال الليل والضوّ يكشح في أمزونه عبدالكريم عبدالرحمن السلّوم – القرائن صورة بها تبدي جمال الطبيعه خضره قسمها السيل من مزن الأمطار فأرضٍ جميله بالمساحه وسعيه وسجه بها فرحه وطوله للأعمار سعود عائش الحربي – القاهرة الكل يفرح ليا شف الخبر وشاف السحابه على مد البصر منظر يشد البصر يوم المطر اليوسفي صورّه بعد العصر السيل يجري على رملٍ حمر والطلح رويان واوراقه خضر عبدالعزيز الصالح - القصب صورة العدد السابق نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى: [email protected] أو الفاكس رقم: 0114871070 ويا هلا..
