كان بيت الأسبوع الماضي من طرح الشاعر عيسى المطيري من الرياض والذي يدور موضوعه حول تأخر نزول المطر ويستغيث الله بهذا البيت : يالله بنو يعم بلاد دولتنا غرب وشرق وجنوب ووسط وشمالي وإن شاء الله استجاب الرحمن الرحيم لدعوته ودعوات المسلمين في كل مكان وقد كان صدى البيت من الشعراء: تشوف برقه تلامع يم قبلتنا تسمع رزيز الرعد والمزن همالي يصب سيله على الوديان فلتنا يعم دارالسعوديين الابطالي في اول الوسم نبديله مسرتنا يسقي فياض تحرى كل نزالي حمد عبدالله الوايلي - حوطة سدير. لا سالت ديارنا تزداد فرحتنا ونشوف بعض العرب بحلّ(ن) وترحالي يالله تجيبه ونلقى به سعادتنا وتحقق آمالنا يارب يالوالي عساه يملا السدود وتصير وجهتنا يم اتجاه المطر ثم يطرب البالي محمد بن عبد العزيز الخنيفر-اشيقر. الغيث ينزل وتكمل فيه فرحتنا واللي نزل قبل ليت يتبعه تالي ولا دعينا يجيب الله دعوتنا ويدبر الله يجيك الوبل همالي وتربع الارض والخيرات عمتنا والنفس تفرح وكل الهم ينجالي علي الرشيد - رياض الخبراء. يارب غثنا وعجل منك رحمتنا سبحان بأمرك كريماً وجهك العالي غيمه وديمه تغيث ابها جزيرتنا من البحر للبحر امطار واخيالي بأمنك وامانك تعز ابنا حكومتنا وتنصر جنودن عليهم حرب وقتالي شجعان المقاطي - الرياض. رحمتك ياربنا بالخير عمتنا عم البلاد المطر والغيث لا زالي همال فوق الوطن بالحيل شاقتنا سحّبه ورعوده تعاقب بالسماء العالي عسى مقاديمها مدرار لاسّقتنا في ساعة ٍ تجعل الوديان للجالي مشعل بن صنت العصيمي - الخرج. يا واحدٍ في يِدِه تفريج كربتنا ياللي له الحمد في مرٍّ وفي حالي نسألك غيثٍ يعم رْبوع ديرتنا يسقي ثرى المملكه سَهْلٍ مَعَ جْبالي والأرض تصبح خضارٍ فيه متعتنا ترتع بِهِ أنعامنا والطير جوالي ناصر جمعان آل عوض - وادي الدواسر. لاسالت أرض الفخر تحلى مسيرتنا وتلقى العرب يمها روحات واقبالي والحمد لله عم الخير ديرتنا والكل يفرح بشوف البرق وخيالي والجو لاجاء المطر نفرح بطلعتنا وجبالنا حولنا تشبه لشلالي ريان محمد الخنيفر - اشيقر. بيت الأسبوع طرحه للشعراء الشاعر حمد عبدالله الوايلي من حوطة سدير في حكمة غير هذا البيت: لاخاطبك خبل من الناس مطفوق خلك عزيز النفس وارفع مقامك نستقبل صدى هذا البيت بثلاثة أبيات فقط تدور حول هذا الموضوع وخلال أربعة أيام من نشر البيت ويفضل الإرسال عبر الإيميل: [email protected] ونرحب بطرح بيت الأسبوع
