قصيدة "الملك سلمان" للشاعر محمد بن نغموش

ابا استأذنك يا سيدي واللسان حصان
انا قدها ولا ادعي بالمثالية
يا ربي تثبتني ثبات مثل حسان
ولا تزيغ قلبي مثل الأعشى ومن زيه
من الشعر سحر يجذب اللب ولآذان
بيان العرب ما فيه جني وجنية
اذا طاول الوجدان هاجت بي الأشجان
فارتب حروفه بين وزن وقافيه
وانا طفل اشوفك واكتب اسمك على الجدران
تخيل شقاوة طفل واريا طفولية
ودار الفلك والوقت وافترت الازمان
وكبرت وكتبت اسمك على أبيات شعريه
على فلسفة شاعر خذيت اسمك الرنان
رسمته من افكاري على اشيا حقيقية
(وسلمان ) اسم باوله ( سلم ) واطمئنان
تعامل ملك مع شعبه بكل حنية
ولامه وميمه ( لم ) شمل اصدقا واخوان
من أقصى الجنوب الى الحدود الشماليه
وآخر حروفه تربط الأمن والإيمان
نفوس رضية في وطنها ومرضية
هذا اسمك وقسمك في الشواهيق يا كحيلان
وشخصيتك ربك جعلها قيادية
علوم الرجال اللي تفاخر بها العربان
تورثتها من بوك ما جتك عارية
وستين عام في حياتك لها عنوان
معانيه من بذل وتفاني وجدية
وشتان فيما نشوف من قادة الأوطان
على الواقع اللي فيه رخص وهوانية
بعضهم يشيل الشعب في داخل الأعيان
وبعضهم يقول الشعب من تحت رجليه
أيوالله فينا من سبب ما يصير احزان
الأرواح تزهق دون رحمة وماويه
ولكن مصير الظالم يعود للديان
ويدفع فواتير المظالم علانية
ملوك البشر تطمح لكن ( حافظ القرآن )
طموحه رضا الله عالم الغيب والنية
مادامه بصدرك فانت في جنة وبستان
ثمرها على قلبك وبالروح مجنية
كتاب نزل رحمة من المعطي المنان
على منقذ الأمة والاوضاع شركيه
هله هم هل الله واثقل الناس في الميزان
لهم عند لحظات التغابن خصوصية
يشافي الصدور اللي توغل بها العصيان
ويداوي الجسد ويعالج أمراض نفسيه
ويخنس به الشيطان والساحر الفتان
ويحرق طلاسمهم بقدرة الاهيه
علاشانه احمد ابن حَنْبَل ورا القضبان
واحمد بن ابي دَؤاد يسعى ورا غية
ومن ادعى خلقه لأجل يرضي السلطان
خذله الولي وأصبح من اقوام سفليه
لو ان الشجر اقلام والحبر له طوفان
تفانت وكلماته بعد مثل ما هيه
هو المعجزة للخاتم الهادي وبرهان
تحدى به أهل الضاد حسن وجمالية
هو العدل والحكمة ، هو الحق والفرقان
هو الفصل ليس الهزل لاهل الضبابية
هو النهج والدستور والنور والتبيان
عليه اتحدنا والقوانين شرعية
ونبقى على التوحيد لو كان مهما كان
عَصّب كف ما نقبل ديانات وهميه
سلامات ياللي تطلب بوحدة الأديان
ترا الدين واحد والرسالة سماوية
ومتى ويوحنا مع غطرسة سمعان
دمر دينهم شاؤول عقب اليهودية
تبينا نصدق شي ما يدخل الاذهان؟
تبينا نتغابى والمساعي سياسية ؟
عقيدة هل التوحيد تربا عن النقصان
ما هي بفلسفة ولا قوانين وضعية
عقيدة هل التوحيد ما تقبل الخذلان
ولا ترتضي للناس ذُل ومحقرية
عقيدة هل التوحيد فيها البشر سيان
شعوب وملوك خاضعة للعبودية
عقيدة هل التوحيد يا سيدي سلمان
نعاهد عليها دامت ارواحنا حية
يقوله جبل قحطان عن داعية قحطان
وعن كل سكان الديار السعودية
نبايعك بيعة حق في طاعة الرحمن
معك في رخا ولا ظروف شقاوية
محمد بن نغموش