• مرحبا بكم متابعي أخبار لول العالمية، اللي ما تترك جحر في العالم ما تجيب أخبار منه، ملصقين آذاننا عند بيوت خلق، ولو يتهاوش ربة بيت مع خدامتها نقلنا لكم الحدث بالصوت والصورة، لعيونكم ممكن نطمر مع شباك المطبخ ومعنا كاميراتنا عشان لا جبنا الخبر وإلا هو مايخر الماء، خلكم من الحكي الفاضي، اتركوا عنكم السي إن إن ،أصلا من اسمها مبين ما وراها خير، أنا من دريت أن باسمها إن إن قلت يا ولد خلها تولي، وافتح لك قناة إخبارية.. ابقوا معنا.. اقبضوا القاع وين تبون الدنيا برا بروق ورعد وصواعق وكم سيارة مرور مشغلين السفتي بزعم أننا ننقذ ...الله من قل الدبرة ... • ياربي لا تبلانا.. بعض الأخبار ما ودك الواحد يقراها، بس وش نسوي الشكوى على الله ، مجبورين نقرأ الأخبار عشاننا تونا فاتحين وكالة أنبانا ولا نبي خساير من أولها، يقول هالاخبر اللي يروع، واللي ما يرتاح راح تحوم كبده، إن فيه سربوتين من سرابيت السوفيتيين قاموا الله لا يجزاهم خير بتغريق بنت وأكلوا لحمها بعد ما قطعوها كذا قطعة، ياربي لك الحمد على نعمة الإسلام. • فيه خبر ما ظنكم ياعزائي اللي تحبون الأخبار اللي عليها الكلام إنكم تنبسطون لو قريناه عليكم ، لأنه خبر ماش، ولاعمركم سمعتوه بأي نشرة أخبار بالعالم من أول اختراع نشرة الأخبار إلا الحين، هالخبر الله يسلمكم يقول إن النادي الأدبي بالرياض راح يسوي أمسيتين ومعرض كتاب خيري، الأمسيتين عني ما راح يحضرهم إلا أقارب اللي لهم الأمسية، وراح يقولون شعر فصيح، أما عاد الشي اللي يضحك هو سالفة معرض الكتاب الخيري، يعني من كثر الناس اللي معجبهم أدبي الرياض راح يجون ركض ، أصلا ما فيه أي مواطن سعودي يدل مكان نادي الرياض الأدبي، حتى لو كان وده يتبرع بكتب ما راح يعرف وين يروح، بعدين بالله منهو هالفاضي اللي عنده كتب وممكن راح يفرط فيها لعيون نادي الرياض الأدبي، امحق نادي أدبي اللي أول نشاط له يطلب تبرعات بالكتب! • هيلاري أم عيال الريس الأمريكي السابق كلينتون، اللي صارت الحين تشطح وتنطح، صرحت تصريح مدري وش تحس فيه يوم قالته، تقول إن دوشة تجهيز عرس البنت زي دوشة مفاوضات السلام بالشرق الأوسط، اهبي يا هيلاري، أثاريها تعرف تذب ذبات سياسية، شي يضحك، يعني كل العالم تدري أن الشرق الأوسط كل شي فيه يدوش الراس، وأم تشيلسي تبي تورينا أنها خوش ربة بيت وتختب بعرس بنتها، ومسوية نفسها أم العروس، كني أشوفها متربعة هي وبنتها وماسكات ورقة وقلم ويكتبن أسماء الحريم اللي ناويات يعزمهن، ماحنا قايلين مبروك، وعساك يا هيلاري بالنسيب اللي يقول لبنتك: أمك ذي لا عاد تطب بيتي.
