بلاد العرب أوطانك!

سبحان اللي خلق المخ العربي، تحس ان امخاخنا حنا العرب شي مختلف عن أي مخ موجود بالمجرة الشمسية، بعض الناس يحسب اني انسان معقد لا سمح الله، او طاح على راسي مكيف وانا صغير، أو طمر بحضني قرد من قرود طريق الهدا فسبب لي انفصال فيوز بالفهم، كل هذا لله الحمد ما صار لي، ولو حطيت راسي بسطل موية ماراح تلاقي تنسيم، يعني ماجبت هالكلام عشاني كاره العرب والا ميت بدباديب الغرب الله لايقوله، بس لازم تكون عندنا روح رياضية ونقبل بالأمر الواقع، واحد وعشرين دولة عربية مو قادرين يكون لهم وضع بين الناس، ليش مانفكر؟ ليش ماحنا قادرين يصير لنا قيمة بالامم المتحدة والا حتى بالفيفا، وليت بعضنا يسلم من بعض، ماسكين حلوق بعض، والمشاكل قابسه بين الكثير من الدول العربية، ولاقريت الكتب المدرسية حقتنا تحس ان العروبة شي ودك تكبر بسرعه عشان تعيشه وتحس فيه، ودك تكبر بسرعه عشان تشغل سيارتك وتدخل كل بلد عربي وتصور مع كل موظفين الجوازات بالدول العربية وترقص معاهم على أغنية (بلاد العرب أوطاني)، بس لاكبرت وعرفت الحقيقة تنصدم أن الحلم العربي مليان كوابيس تصحيك من عز النوم، وان الدعوة كلها خرط في خرط، ولو تعدى السرى بجوازات أي بلد عربي حسروا فيك لين تعاف العروبة وسنينها، ويمكن بعد يبطحونك على الارض ويمسطونك كم خيزرانه ويمكن يلفقون لك تهمة ترويج مخدرات عشان يزرفون قريشاتك اللي أنت جاي تفسح بها وتشوف بلاد العرب أوطانك!