موظف مهني جدا

يعجبني الموظف الحكومي اللي ينظم وقته، ودك تجيبه يسوي محاضرة بعنوان «كيف تتجاوز المصاعب بأقل المتاعب».. هذا اللي من جد يفيد المواطنين.. يكفي أنه يختصر زمنهم قبل حتى ما يطالع لأوراقهم.. «ماجانا شي بخصوص معاملتك».. وبعدها يرجع لتنظيم الوقت لأن ساعات الدوام يادوب تكفي.. واحد يوصل مكتبه قبل نهاية الدوام بساعتين ونص، ويطلع منه قبل نهاية الدوام بساعتين إلا ربع.. يعني بالله متى راح يفضى يقرا الجرايد والا ياخذ له بيالة شاي تخفف عليه تعب المجهود.. ومتى راح يلقى وقت يشيك على ايميله ويسير له على كم منتدى ويزيد من ثقافته العامة عشان يستغلها في خدمة أبناء وطنه الحبيب اللي ما يبغى يعرف معاناتهم لأنه قرأ مرة ان الانسان لازم يتجنب أي موقف يخرب نفسياته.. ويجيك المراجع الله يسامحه ويزعل.. قال إيش ماقابلنا مبتسم.. يعني انت شايفه فاضي يتبسم، الرجال في منتهى الجدية ويقدر انه في مكان رسمي ويمكن الابتسامة في هالحالة تطلعه من مود المهنية والحيادية.. والا تبيه يجاملك على حساب برستيجه لاسمح الله وهو ماشاء الله من الظهر الباكر في مكتبه.. والا تجي الله يهديك وتقول «سألته ومارد علي» شايفه معلق على وجهه لوحة خدمة العملاء مثلا.. والا تبغاه يبطل التأمل في الثقافة العامة عشان سالفتك اللي ماراح تفيد المجتمع بأي شي.. بعدين وش ذنبه اذا منت راضي تفهم المثل الشهير «اللبيب بالإشارة يفهم» لازم يتكلم يعني؟