الدوسري: ما فيه مثل مسلسلات سعاد عبدالله

شاهد عيان من الشارع العام، على الأعمال الرمضانية ونجومها.. له وجهة نظره تجاه ماتابع من الأعمال وله رأيه الخاص بالطبع..
وش رايك في مسلسلات رمضان؟
زي العادة بعضها زين وبعضها شين وبعضها تكملة عدد.
طيب.. وش أعجبك ووش اللي تتابعه؟
أتابع «طاش» وإذا قدرت أتابع «سكتم بكتم» وفيه مسلسل ليلة عيد ومسلسل زوارة خميس وبعض حلقات من باب الحارة.
على طاري «زوارة خميس».. كيف تشوفه؟
أوووه من أجمل مسلسلات هالسنة.. يا هو وقع على كل القضايا وسحب البساط من تحت كل المسلسلات.. يعني بالعامية ما فيه مثل مسلسلات سعاد عبدالله ولا تهون حياة الفهد.
من هو الفنان الذي كان حضوره هذا العام طاغيا؟
ما فيه غير أبو قصب ناصر القصبي وعبدالله السدحان وأيضا فايز المالكي.
طيب يا ترى من الفنان اللي من تشوفه تغير القناة؟
يا أخوك فيه مسلسل بعد مسلسل «سكتم بكتم».. هين مروه تنبلع لكن اللي معها نسيت اسمها لكن والله مدري كيف حطوها ممثلة، لا كلام ولا أداء وحين أشوفها أغير المحطة.
طيب تخيل يجي يوم وتصير منتج من الفنانين تبي تختار وتسوي لك مسلسل؟
والله فيه أكثر من فنان رائع، فيه ناصر القصبي وبشير الغنيم والمالكي والسدحان وعوض عبدالله، ومن الفنانات أبي أختار حياة الفهد وسعاد العبدالله وسمية الخشاب، عشان ينجح مسلسلي.
والمسابقات كيفك معها؟
فيه مسابقة على قناة الوطن حلوة أتابعها بس نسيت اسمها.
ومسابقة حليمة بولند.. ما تشوفها؟
هاه.. تبي الصدق هم حاطينها عشان تجرح صيامنا عشان كذا أنا ما أتابعها.
طيب والبرامج الدينية؟
بصراحة هناك تقصير في شهر رمضان بالبرامج الدينية من بعض القنوات يمكن لأني مو متابع كثير بس خواطر وبرنامج العودة أحرص عليها.