كحيلان

لاباس ياكحيلان راس الرياجيل
خطاك سو، وكيد غادر وكذاب
الحمد لله يوم صارت تساهيل
كبرت وهانت.. يوم شيطانها غاب
ياسيدي خانوك (غذوة اسرائيل)
أشباه فيران الجحاره والأسياب
ياسيدي مامن وراهم محاصيل
راعي الخيانة لاتثق فيه لو تاب
مديت بيمينك لهم ورد وأكليل
وردو عليك بحقد..جمره ومشهاب
أنته عطوف وطيب القلب بالحيل
وتبغى الجميع أقراب، وأصحاب، وأحباب
وأهل الغدر! يسعون للكيد في ليل
ويدبرون الشر عدوان وأحزاب
جو لك بلبس الود خدعة وتمثيل
والداب! ناعم لمس، والسم في الناب
لكن خذلهم من خذل راعي الفيل
وسلط على الغادر بفعله وماجاب
ياسيدي..ماعاد فيها تماهيل
ومن لايشوف الفعل بالسيف! ماهاب
خل الصبح تكبير، والليل تهليل
من فوق روس أهل الفتن، وأهل الإرهاب
والله يمين الشرع مايعدل الميل!
ياكود حذف الروس من فوق الأرقاب
والشرع واضح..فيه للحكم تنزيل
آية صريحة قالها رب الأرباب
من حارب الله والنبي عمد،ويعيل!
ويسعى فسادا في الأراضي! له إحساب
جزاه! يقتل، أو يصلب وتمثيل
وعليه دعوة خزي في كل محراب
وياسيدي من ماضي الوقت قد قيل
قولٍ موثق بين قاري، وكتاب:
(الحنظله لو هي على شاطي النيل!
زادت مرارتها) وقطافها! خاب
ولاباس يا محمد ياراس الرياجيل
خطاك سو أهل الخيانة والإرهاب