شاعر نبت مع نخل والده في قريتين ورعى الغنم طفل لا مرّه هبوب لفحه هشّ بعصاته ، وبعد اثنا عشر بسنتين سرح مع نياق ابوه وكل بيد سرحه تعلم وهو صغير وعلّمته السنين وتغرّب وجرّب وعرفه معه ونصحه جته من الله ياحلوك يارضى الوالدين مفتاح الارزاق والتوفيق يتوشحه واليوم والله بخير ونعمة الله تبين الله رزقني واخذت من الكلام افصحه وما زلت انا الشاعر اللي بعض شعره حنين والشعر اما يموحك فكر والا محه وين انت ؟ وين انت يا رجلٍ اعدّه فطين ؟ ادليت دلوي عسى به خير لك وامتحه احسن به الظن واسترجع وربك يعين الخال ثلثين والرجل الكفو نمدحه واللي حكى لك حكى بك كلنا عارفين وْهو لو يشوف العدو يقفاك ما ينطحه تخاف لا تزعّل الاجناب في كلمتين وتغرس بظهر ابن عمك شاطر الاسلحة تفرح اليا شفت به هم ولقيته حزين والا تمنى عليه ان الزمن يطرحه يقلّطك وسط صدره منزل الطيبين وتلعب براسك شياطينن ماهي ممرحه ادخل على الله وين وراعي الوصل وين الوصل ما هو طليٍ بالشهر نذبحه نقطع به الوصل لو نعزم عليه اربعين ونغتاب ( يالله لاتفضحني ولا تفضحه ) اشلون نقدر على ابن العم يامسلمين يا علّني ما اعدم ابن العم ولا اجرحه وإن حطني له عدو ، اصبر واردّد : تزين يارب تصلح لي النية وهو تصلحه ماني عدوّه ، انا له والذراع اليمين حقٍ من الله علي والله مهو مصلحه جيته من نهير المدهال للغانمين وتجيبني من خلف وقفاته ومشلحه جدي نهير ملاذ اللي وطته السنين وجدي خلف وإمْرِته تبقى ولا تبرحه جدّين جدّين .. حطوا قيدهم باليدين انا مقيّد فأمر مشروح لاتشرحه غصبٍ على شاعرٍ على المواصل أمين يقول مشاعره والطيّبه تنجحه واليا لمح من بناخيّه محبّه ولين يفرح كثر وقفت الاجناب ما تفرحه ما اقولها من فقر : لله يا محسنين اغفر واستغفر الله وابن عمك بحه ولا تدوّر جزا الدنيا : جزاك الثمين : ب الآخره ، والخطا لا جاك منه ادمحه الطيّب اللي خذاها صدق في حاجتين يدمح ولا اخطا على ابن العم يستسمحه معروفه : الأولوية عنده الاقربين صميدعيٍّ بوجهه كل ميل مسحه ياطيب من يجمع الثنتين دنيا ودين عسى براد الحياة الطيبه ينفحه تجاوز الناس بأخلاقه وعقله رزين كل ما يحاول به ابليس اللعين كسحه
