نقطة نظام

تقهو يا ابن هميجان ..تقهو وخل عنك كثر اللوم , صحيح حنا في رمضان , وهالشهر له روحانية تستوجب أن يكف الإنسان عن اللغو , تراني متحملك من يوم دخل الشهر وأنت ما عندك هم إلا علقمة .. والناقص تكمله أختي المنكوبة بسفاهة ابنها شرار ..يا ناس , أنتم ما تشوفون هالشعراء وش قاعدين يسوون , يا ناس أنتم ما تشوفون اللي قاعد يصير بالعراق وفي فلسطين , وهالشعراء التافهين قاعدين يتغزلون , بالله عليكم هذولا ينسكت عليهم , على افعالهم ..لا واللي يفقع المرارة مقابلاتهم اللي والله أن شرار بكل تخلفه وبلاهته وتبلد حسه , أحسن منهم , على الأقل شرار لا شاف مناظر الأطفال اللي يطلعونهم من تحت المنازل المهدمة بفعل الصواريخ والقنابل , تنزل دمعته ( يا حبة عين خالك ) بس هالشعراء اللي كنهم زاوحف باردة الدم والله ما جابو خبر , ولا يدرون وش قاعد يصير حولهم , وتقولون كف لسانك عنهم ..!!
هاللحين ليش ما تنصحونهم خصوصا ً وهم يدعون أنهم شعراء وأنهم يمثلون ضمير الأمة .. أمحق من ضمير . و أمحق من شعراء ..
أسمع يا ابن هميجان أنا رايح أضع نقطة نظام أمام شعراء آخر زمن لأقول لهم .. لن يحميكم رمضان من لسعات علقمة , لأنكم خنتم الشعر وخنتم الأدب هذا إذا كنتم شعراء كما تزعمون , وزعمكم هذا لابد أن يضع له علقمة حدا, إذا لم تكتبوا عن أوجاع ومآسي الأمة , ورايح علقمة يعطيكم مهلة إلى بعد رمضان , وبعد رمضان ترى أبو العلاقم رايح يكتب عنكم بالأسماء وقد أعذر من أنذر .. صب قهوة يا بجاد لابن هميجان ورح جب (الفرد) وحطه على صابره ولا ترفعه عن راسه حتى يبصم على نقطة النظام هذي على شان بعد العيد ما يقلع لي راسي بنصايحه اللي سببت لي الصداع .