عطر الشال

الله يا عطر ترشه على الشال
مدري تصبه صب وإلا تشيله
خلت حياتي بين دمعه وولوال
وتنهيدة بالصدر يا هي ثقيلة
صديت عنها لكن القلب ميال
يقطعك يا قلب العنا والفشيلة
يا قلب لا تركض ورى طيف واخيال
أصبر ومن يصبر ينال الفضيلة
شربت من كأس الهوى ربع فنجال
وشلون منهو شرب حتى الحثيلة
راع الهوى يشرى العنى دوم بريال
ما عاش من يشري حياة ذليلة
تبنا إلى المولى ونرجيه الأقبال
يا الله عسى باقي حياتي جميلة
والحمد لله طايع بكل الأحوال
لكن نشقى بالحياة الهزيلة
يا من تعرض للمواقف والأهوال
خلك على دينك وحاذر بديله
وعان كنت تسمع للشياطين تغتال
من تحت الأرجل فانتبه با لدليله
هذي علومي قلتها وأعرف الحال
دنيا الزخارف ضللتنا ضليله
لكن اببعد عن شفا جرف مهيال
واصلي افروضي واعد الطويلة
بعض العرب ما له من العقل مثقال
عقله غدا ما عاد يلقى قليله
راحت حياته بين فن وجوال
ومكالمات الليل يا هي طويله
واللي يكلمها من الحب تكتال
كلمه ورى كلمه وهذا حصيله
ومن الذنوب العبد ما عاد يشتال
نسى وراه الموت وأيضا المهيله
وان كان تسمع قولتي دوك الأمثال
دنياك شمس تغيب بأسرع وسيله
احذر ادروب الغي يا طيب الفال
خلك على خطك وحاذر مميله
وان شفت بعض الناس له بشت وعقال
لا تمدحه حتى تجرب حصيله
الناس ما ترحم إليا صرت عيال
واليا وطاك الوقت خلوك عيله
خليل المطيري