عارف البير وغطاه

اللي رحل عنّي واخذ قلبي معاه
ودّعته اللي ما يخون وداعته
ليته عقب مْ اقفى مْ طالعني وراه
وناظرعيونٍ راعته.. ثمْ راعته
وْوقّف وبيّح دمعة الصافي خفاه
لا بارك الله في الوداع وساعته
يا أنعم وأطعم ملذات الحياه
عيّت ليالي عاشقك ما طاعته
وحظّه كما عَودٍ عمى ليله سراه
والدرب اضلّه والعيون اضاعته
والبرد حدّه واشعل النار بعصاه
والياس قازه والأمل ولّاعته
حبّك هِنا يا عارف البير وغطاه
ما له غطا واللا نهايه قاعته
حفظت سرّك مثل حفظي للصلاه
وْلو ذابت ضلوع الصدر ما باعته
لْمن داج معْ من داج في سوق الوشاه
وانظف ثياب اهل العفاف بضاعته
رشيد الدهام