فرصة نجُود ببر ونقدّم إحسان ياكم واحد مات ما تم تاليه

كان بيت الأسبوع الماضي من طرح الشاعر شجاع بن حمود الهجهوج من الرياض في استقبال شهر الغفران والقرآن ويقول:
أهلا بشهر فيه عفو وغفران
وعتق من النيران ربي يحييه
وكان الصدى من الشعراء:
شهر الفضيلة شهْر طاعة وفرقان
القدْر في شهره وآيٍ نزل فيه
شهرٍ تفَتّح فيه جنات رحمان
يا سعْد من صامه وقام بلياليه
وعمّره بالطاعة وترتيل قرآن
وحبل الوصل مدّه وخلّا المشاريه
فرصة نجُود ببر ونقدّم إحسان
ياكم واحد مات ما تم تاليه
ناصر جمعان آل عوض - وادي الدواسر
فضل من الرحمن معطيه الانسان
يرفع رصيده ثم تكثر حسانيه
الرابح اللي يقضي الوقت لا حان
بأعمال خير تنحسب عند واليه
نطلبك يا ربي تكرم واحسان
من خير ما عندك علينا توفيه
علي الرشيد - رياض الخبراء
شجاع بن حمود جاراك شجعان
الله يحيي الضيف وأهلا بطاريه
من صام رمضان باتقان وايمان
يدخل مع الريان بيبان واليه
حتى الطيور تصوم ما هوب بالانسان
عسى نصومه أوله ونقوم تاليه
شجعان المقاطي - الرياض
ضيفٍ على الإسلام في كل الأوطان
شهر التُّقى والصوم كلٍ فرح فيه
يا بخت من صامه قناعات ويمان
وبالبر والاحسان والذكر يحييه
أوله رحمة وبالوسط صار غفران
وعتقٍ من النيران بتلاه نجنيه
سعود عائش الحربي - جدة
حييت ياشهر التراحم والايمان
شهر رمضان الكل منا متحريه
أفضل شهور العام في كل الازمان
نزل به القُرآن والوحي لموحيه
أحمد رسول الله قرأ سر قُرآن
وحنا نصوم وفرض ربي نصليه
أمة محمد عزها بخمس الاركان
والصوم مفروض ٍوفطره نزكيه
مشعل بن صنت العصيمي - الخرج
ضيف قدومه خير والخير له شان
شهر كريم ودايم مفتحه فيه
ليله أنيس ويهان به كل شيطان
شهر العبادة والعرب رحبوا فيه
شهر نصومه دايم الدوم لابان
من يدركه صامه وربي يهنيه
خليف فهيد الحربي - الرياض
وعلى وزن مختلف كان هذا الصدى:
وبأمر الرحمن ربي يفتح الجنان
وكم شخص بذا الشهر ربي يهديه
والصايم فيه يحفظ ويتلو القران
والكل يتمنى ذَا الشهر ويحتريه
ويكثر فيه الخير والكرم والغفران
حتى المسافر من صيامه ربي يعفيه
طلال المبطي - الرياض
بيت الأسبوع
كتب بيت الأسبوع الشاعر سعود عائش الحربي من جدة ويقول:
لي ديرةٍ قبلة الأوطان
في كل شيٍ هي الأول
نستقبل صدى هذا البيت بثلاثة أبيات تدور حول هذا الموضوع
خلال أربعة أيام من نشر البيت على الإيميل:
rb-khozama@alriyadh.com