السما والأرض في أروع جمال برق وخضار ومي ربّي أبدعه

هل السحاب وصافي الوبل شفناه
حدّر مياهه في شعيبٍ مريفي
الحمد لله يوم ربّي سقاناه
رويت اراضينا وزان المصيفي
قمنا انتباشر يوم رعده سمعناه
والجو غايم والهواء به خفيفي
علي الرشيد - رياض الخبراء
السحاب اللي بروقه عقربيّه
واضح برقه وهو تالي نهاره
لا تراكم ثم ترادم في مسيّه
رنّت رعوده وبين له بشاره
هل مزنه وارتخى فيه برديّه
عامنا عام فضيلٍ في مداره
سال سيلٍ راهي منه الهنيّه
ارتوت كل المحاجر والشجاره
حمد عبدالله الوايلي - حوطة سدير
الناس عادتهم تلِمّاس الأخبار
عنِ الحيا تسأل وتكثر مِنِ الْعَس
وعيونهم للجوّ موجات رادار
يستبشرون إن غطت غْيومه الشمس
تولّعَوْ بالغيث أطفال وكْبار
لا هلّ وبْله كنهم في فَرَحْ عرس
والحمد لله عمّت الدار الأمطار
والأرض لبْسَتْ سندسْ يِبْهِجِ النفس
ناصر جمعان آل عوض - وادي الدواسر
السما والأرض في أروع جمال
برق وخضار ومي ربّي أبدعه
منظر ربيعٍ شوفته تشدا الخيال
سبحان من في وقت واحد جمّعه
برقٍ يشق المزن شرق وشمال
وسيلٍ على خدّيه منظر ماروعه
ذا وقت سج الرجل في بضعة لِيالْ
خافقك والشوف بحسنه متّعه
سعود عائش الحربي - جدة
الخير مقبل والاراضي بها سيل
احياء بلاد ميته زخ الامطار
جواً طبيعي والسماء فيه تشكيل
سحب بكل انواع تلفت للانظار
دهم السحايب معتمه كنها ليل
والبرق ما يفصل يبشّر بالاخبار
يالله تسوق الخير لمن بهروا هيل
يملا لصاد وتمتلي منه الآبار
سعود عبدالعزيز الهزاع - نعام
يا ماحلا البرق والغدران
بالوادي اللي تشوفونه
حلو الطبيعه ولا فنّان
والبرق لا يخطف اعيونه
من فضل ربي جرت وديان
سبحان يا وامر امزونه
عبدالكريم عبدالرحمن السلوم - القرائن
ربيعنا اللي جاء بعد وقتٍ طويل
زانت به الارض بعد ما هي موحله
الارض خضراء والمي عذب سلسبيل
والبهايم ترعى .. كل شيٍ تاكله
ريح الخزامى والنفل ماله مثيل
واللي يبي الوناسه زهابه شايله
زانت لنا الكشتات .. والجو العليل
وشوف البروق اللي عيوننا تخايله
خالد ناصر المخيمر - روضة سدير
شعيب يمشي والشجر حيل يختال
وبرق وسحاب مصوّره خوش فنّان
وين انت ياللي تعشق البر تهتال
ووين أنت ياللي تنتظر ليت لو كان
تكشت براري صحصحٍ تو ما سال
بين الشعاب وبين نفدٍ وضلعان
دار الكرم والجود في دار الأبطال
حيا هلا يا مرحبا عد الأمزان
عبدالكريم النغيمشي - لوذة
شفنا دروبٍ بعضها صار مسدود
ودفاعنا شفناه وجّه تحاذير
الكل يسعف باذلٍ كل مجهود
الكل وافي له تحيّة .. وتقدير
هذي بلاد الخير والطيب موجود
الخير واجد مابه اليوم تقصير
ريان محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق