قائد الأمة

يالله عساك تعين ماغيرك على الشده معين
حمي الوطيس ومعركتنا ولعت نيرانها
نيرانها قامت تقادح من يسار ومن يمين
واهل الخيانه للخيانه شرعو بيبانها
في ذمتي ما للخيانه والغدر عذرن سمين
لا بارك الله فالرجال اللي تخون اوطانها
تبت يدين اهل الضلاله ياقصيرين اليدين
ذي قبلة الاسلام بالله وش عذر من خانها
مهبط كتاب الله ماهي مهبطٍ للخاينين
واهل الضلاله في جهنم يندحر شيطانها
تكرم بلاد المملكه ماهي ملاذ المفسدين
انا احمد اللي بالرساله والنبوه زانها
منها سطع نور الهدى بالصدق والحق المبين
دستورها من مشرق الاسلام نور ايمانها
حنا ورثنا المجد والتاريخ في عرف ودين
الكل يشهد والمواقف مثبته برهانها
وحنا وقفنا وقفة تنقال في غبر السنين
واليوم زانت نحمد الله واستوى ميزانها
ياخادم البيتين حنا فالشدايد مانلين
خذنا حزامك فالشدايد لاحما ميدانها
برقابنا بيعه ولك ياسيدي عهدن متين
بيعة وفاء نكبر مع العالم ويكبر شانها
ياسيدي قسماً بمن حل القسم للمقسمين
الزمره اللي تشعل الفتنه نفص لسانها
تحت الامر ياسيدي أشر وحنا حاضرين
صدورنا درع الوطن لاثورت دخانها
ماحركتنا زمرة الشيطان في جمعة حنين
ولا حركتنا ثورة الطغيان في طغيانها
حنا صملنا ساعة الشر وانت سيد العارفين
صملة رجالن ماتخون ولا ما تبوق ايمانها
ومادامه محمد ولد سلمان لك عضد وعوين
ابشر ونبشر بالسعد والخيل من فرسانها
حفيد ابو تركي مجودها على عسرن ولين
شبيه من وحد جزيرتنا وشال احزانها
رجل جمع مابين حكمة راي والعقل الرزين
صليب راسن والرساله بينن عنوانها
انشهد إن الدار ياسلمان في كفٍ امين
اخَيْر من وليت ياسلمان رجل صانها
له ضربة توجع كبود اهل الظلال المفسدين
وله شجرة بالخير شعبك يستظل أغصانها
استغفر الله مو كبر لكننا متفاخرين
اقولها واكبر فخر للملكه سلمانها
ومن لا تفاخر فيه ياعله مراح الهالكين
نعمه من الله وش حدا الجاحد على نكرانها
ماحل باسم الدين ياهل الدين ذبح المسلمين
دوله سعت في نصرة الاسلام والله عانها
اي والله ان الامن والعيش الرغد كنز ثمين
مايعرف النعمه سوى اللي مبتلى بفقدانها
شف حولنا جفت ينابيع وهي كانت معين
لانحقر النعمه ولا نوصي على حقرانها
ثوراتهم ماخلفت فيهم سوى جرح مكين
ثوراتهم فتنه عليهم ثورت بركانها
ويالله يامرسل نبيك رحمةٍ للعالمين
تعلي حكومتنا وتنصرها على عداونها
وختامها ياقايد الامه بصدري كلمتين
حنا حزامك والمعارك في يديك عنانها
هذا وصل الله على المبعوث سيد المرسلين
قاد امة التوحيد للقمه وشاد اركانها
ويالله طلبنا العون فالشده ولا غيرك معين
الشر يقدح والمعارك ولعت نيرانها.