تبي 50 .. خذ 100 وخلصنا

تبي 50 .. خذ 100 وخلصنا
- سلام عليكم .. وينك يارجل من زمان ما شفناك
- عليكم السلام .. مشاغل يا غالي
- الله يعينك
- امين
- شكلك ما تعرفني يا صقر
- لا والله يا اخ اعذرني
- معذور .. انا من زباين قهوتك كل يوم انا موجود في القهوه
- اللهم كثر زباينا ههههههه
- ههههههه
- تفضل اخوي ايش تشرب
- شاي نعناع
- ابشر .. مسعود .. واحد شاي نعناع وواحد شاي اخضر
- الله يزيد فضلك .. اامممم يا صقر ودي اسولف لك سالفه غريبه
- تفضل اخوي قهوة الصقر مفتوحه للجميع
- بقص لك قصتي مع احد الدوائر الرسميه صارت لي الاسبوع الماضي
- تفضل
- هذا يا طويل العمر عندي معامله شخصية ابي اخلصها .. رحت للدائره وقدمت اوراقي وجلست انتضر دوري
- جميل
- لما جاء دوري قال لي الموضف عليك غرامه 50 ريال تاخر اصدار ولازم تسددها
قلت مش مشكله اسددها .. طيب وين اسددها يا اخ؟
قال في بنك الرياض او الراجحي من الصراف في نظام سداد الحكومي وجيب معك وصل السداد الي يعطيه لك الصراف
قلت طيب يا اخوي انا ما عندي حساب في البنكين؟ كيف اعمل؟
نظر الي نظره غير مباليه وقال : دور لك واحد عنده حساب فيهم ويسددها لك
رديت عليه : وشلون ادور واحد؟ اوقف عند الصراف واشحد خلق الله واقول يا اخ ممكن تسدد لي؟
قال لي : طيب وش اسوي لك؟
قلت : ما عندكم صندوق نعطيكم الفلوس وتسددون الغرامه؟
قال : مافيه .. مافي الا نظام سداد في الرياض او الراجحي اقرا التعميم
واشار بيده الى ورقه معلقه على الزجاج لصورة تعميم يحصر التسديد على هذا النظام
وقتها عرفت انه لا فائده من النقاش .. اخذت بعضي ورحت ابحث عن صراف لبنك الرياض
وجلست اشحد في خلق الله .. يا ابو الشباب ممكن تسدد لي غرامه 50 ريال .. امسك هذي الخمسين سددها من بطاقتك لاهنت
وخذ يا صقر مواقف محرجه
- هههههههه
- اي والله عاد انا شكلي شبهه والكل يضن اني ابي انصب عليه
ورحت لموضف في البنك وقلت له ممكن اودع عندكم واسدد الغرامه قال لا لازم معاك بطاقه صراف
قلت ما معي
قال دور واحد معه
قلت طيب انت قم معاي الان وسدد لي واعطيك المبلغ ساعد اخوك المواطن
طالع لي وقال : ممنوع على الموضفين يسوون كذا
فورا رديت عليه وقلت : ول!! ما اسرع ما جبت التصريفه .. والله انك محترف
- هههههه
- المهم بعد عدة محاولات وقطات وجه لقيت شايب طيب وافق واعطاني بطاقته وقال سدد
جلست معه عند الصراف وبديت ادعبس في الجهاز ادور كيف اسدد الغرامه
- حلو
- وش الحلو؟! اكثر من ساعه انا والشايب وعشرين واحد فضولي تجمعوا على الجهاز ما لقينا وين مكان تسديد الغرامه
- اف!!
- والله اكلمك جد .. حسيت كاننا نلعب لعبة الغاز والنظام يتحداك تلقى مكان تسديد الغرامه
- هههههه
- المهم بعد محاولات واجتهادات من عدد من المواطنين قالوا يا ولد رح تاكد واعرف كيف تسدد غرامتك
قلت ما بدهاش .. ورحت للدائره وصرت ادور من مكتب الى ثاني والكل يهز كتوفه
اسبوع الله وكيلك ولا حولك احد
بالاخير وبالصدفه لقيت واحد يلحق موضف ويصايح وين فلوسي؟؟
وتجمعوا عليه الناس والكل يكلم الموضف
ذبحتني الشفاحه وقلت بروح اشوف
- ههههههه
- المهم لما جيت لقيت مواطنين كثير لهم نفس قصتي عليهم غرامات ومو عارفين كيف يسددونها
وواحد منهم سدد على النظام القديم واخذ وصل من عند الموضف الي اخذ منه خمسين لكن قالوا غرامتك ما وصلت الى النظام ولازم تسدد من البنك
وويهز الوصل الي معاه ويقول للموضف رجع لي الخمسين الي دفعتها لك والموضف يقول وهو يبتسم : راحت لبيت مال المسلمين حاول تسدد من البنك مره ثانيه
والكل يصرخ فيه : ما قدرنا نسدد يا ابو الشباب!! الصراف مافيه تسديد غراماتكم
رد ببرود : معليش يظهر ان نظام السداد متعطل انتضروا ممكن يصلحونه الاسبوع القادم
فمسكته وسحبت على جنب وقلت له : انتم تبون 50 غرامه ؟ خذ 100 وخلصني الله يرحم والديك
انتفض وصرخ : ترشيني؟!!!
- ههههههههه هههههههه هههههههههههههههه ههههههههههههههههههههههه
إبراهيم الصقر
Ibrahem.alsager@gmail.com